ماسەلەنى شەشۋ ماقساتىندا دارىگەرلىك امبۋلاتوريا سانىن ارتتىرۋ كوزدەلىپ وتىر.
الماتىنىڭ تۇركسىب اۋدانىندا ءبىرقاتار جاڭا دارىگەرلىك امبۋلاتوريا مەن ەمحانالار بوي كوتەرەدى. بۇل تۋرالى قالا اكىمى ەربولات دوسايەۆ اۋدان حالقىمەن وتكەن كەزدەسۋ بارىسىندا ايتتى، دەپ حابارلايدى Almaty-akshamy.kz.
الماتى اكىمىنىڭ ايتۋىنشا، اۋدانداعى 13 دەنساۋلىق ساقتاۋ مەكەمەسىنە 252،5 مىڭ ادام تىركەلگەن. حالىق سانىنىڭ ءوسىمىن ەسكەرە وتىرىپ، «نۇرشاشقان»، «المەرەك» شاعىناۋداندارىنداعى مەديسينالىق مەكەمەلەرگە تۇسەتىن جۇكتەمە 2 ەسە جانە «جاس قانات»، «قايرات» شاعىناۋداندارىندا 1،5 ەسە ۇلعايعان.
«بيىلعى جىلى ايباسوۆ كوشەسىندەگى 200 كەلۋشىگە ارنالعان دارىگەرلىك امبۋلاتوريانىڭ جوبالاۋ قۇجاتتاماسى ازىرلەندى. 2022 جىلدىڭ 3ء-شى توقسانىندا «نۇرشاشقان» شاعىناۋدانىندا 100 كەلۋشىگە ارنالعان دارىگەرلىك امبۋلاتوريانىڭ قۇرىلىسىن باستاۋ جوسپارلانعان. سونداي-اق، «المەرەك» شاعىن اۋدانىندا جانە رۆ-90-دا ءارقايسىسى 200 كەلۋشىدەن تۇراتىن 2 امبۋلاتوريانىڭ قۇرىلىسىنا جوبالاۋ-سمەتالىق قۇجاتتاما ازىرلەنەتىن بولادى. سونىمەن قاتار، «قايرات» شاعىن اۋدانىندا 340 ادام قابىلدايتىن ەمحانانىڭ قۇرىلىسىنا جوبالاۋ قۇجاتتاماسى ازىرلەنۋدە»،- دەدى قالا اكىمى.
ەربولات دوسايەۆتىڭ اتۋىنشا، №20 قالالىق ەمحانانىڭ دارىگەرلىك امبۋلاتورياسىن تۇراقتى ورنالاستىرۋ ءۇشىن 13 اسكەري قالاشىقتا جالعا بەرىلەتىن عيمارات ساتىپ الىنادى.