دەنساۋلىق ساقتاۋ سالاسىنداعى ماسەلەلەر شەشىمىن تاپپاق.
ول ءۇشىن تۇركسىب اۋدانىنداعى «قايرات»، «نۇرشاشقان»، «المەرەك» شاعىناۋداندارىندا جانە ايباسوۆ كوشەسىندە 1 ەمحانا مەن 3 وتباسىلىق-دارىگەرلىك امبۋلاتوريا سالۋ جوسپارلانعان.
بۇل تۋرالى قالا اكىمى ەربولات دوسايەۆتىڭ تۇركسىب اۋدانى تۇرعىندارىمەن وتكەن كەزدەسۋىندە ايتىلدى، دەپ حابارلايدى Almaty-akshamy.kz.
«اعىمداعى جىلدىڭ IV توقسانىندا «نۇرشاشقان» شاعىناۋدانىندا 100 كەلۋشىگە جانە ايباسوۆ كوشەسىندە 200 كەلۋشىگە ارنالعان دارىگەرلىك امبۋلاتوريالاردىڭ قۇرىلىسى باستالادى. وسى جىلدىڭ سوڭىنا دەيىن "قايرات" شاعىناۋدانىندا 340 ادام قابىلدايتىن ەمحانا سالۋ ءۇشىن جوبالاۋ-سمەتالىق قۇجاتتاما ازىرلەنەتىن بولادى. قۇرىلىس-مونتاجداۋ جۇمىستارىن 2023 جىلى باستاۋ جوسپارلانىپ وتىر»، - دەدى الماتى اكىمى ەربولات دوسايەۆ.
«المەرەك» شاعىناۋدانىندا 200 كەلۋشىگە ارنالعان امبۋلاتوريا سالۋ ءۇشىن جەر ۋچاسكەسىن ساتىپ الۋ پروسەدۋرالارى ءجۇرىپ جاتىر. 2023 جىلى وتباسىلىق-دارىگەرلىك امبۋلاتوريا قۇرىلىسىنا جوبالاۋ-سمەتالىق قۇجاتتاما ازىرلەنەدى.