ماماندار كەلەسى ايدان باستاپ كوشە شامدارىن ورناتا باستايدى.
وسى جىلدىڭ سوڭىنا دەيىن الماتىنىڭ تۇركسىب اۋدانىنداعى ەسكى ەلەكتر جەلىلەرىن جاڭارتۋ جۇمىسى اياقتالادى. بۇل تۋرالى شاھار جەتەكشىسى ەربولات دوسايەۆ اۋدان حالقىمەن كەزدەسۋ باراسىندا ايتتى، دەپ Almaty-akshamy.kz.
«وتكەن كەزدەسۋدە سىزدەر «قايرات»، «نۇرشاشقان» شاعىناۋداندارىندا ۇنەمى جارىقتىڭ ءسونىپ قالاتىنىن ايتتىڭىزدار. ونىڭ نەگىزگى سەبەپتەرى جەلىلەردىڭ توزۋى جانە قۋاتتىڭ جەتىسپەۋى بولىپ تابىلادى»،- دەدى قالا اكىمى.
ەربولات دوسايەۆتىڭ ايتۋىنشا، ورىن العان ماسەلەلەرگە بايلانىستى ەكى باعىتتا جۇمىس جۇرگىزىلىپ جاتىر.
«قازىرگى تاڭدا 4،2 كم ەلەكتر جەلىسى رەكونسترۋكسيالاندى. جىلدىڭ سوڭىنا دەيىن 11 كم-گە دەيىن جەتكىزۋ جوسپارلانعان. وسىلايشا، بۇل شاعىناۋداندارداعى ەسكى ەلەكتر جەلىلەرىن جاڭارتۋدى اياقتايمىز. 2023 جىلدىڭ I توقسانىندا «المەرەك» جانە «قايرات» شاعىناۋداندارىندا وسىنداي جۇمىستى باستايمىز»،- دەدى قالا جەتەكشىسى.
ونىڭ سوزىنشە، قازىرگى ۋاقىتتا جەتكىلىكتى قۋاتتى قامتاماسىز ەتۋ ءۇشىن «تۇزدىباستاۋ» پودستانسياسى سالىنىپ جاتىر. وبەكتىنى 2023 جىلدىڭ II توقسانىندا پايدالانۋعا بەرۋ جوسپارلانعان، سودان كەيىن وسى شاعىناۋدانداردى تۇراقتى ەلەكترمەن قامتاماسىز ەتۋ ماسەلەسى تولىعىمەن شەشىلەتىن بولادى.
«وسى جىلدىڭ سوڭىنا دەيىن ءالى جارىق جۇرگىزىلمەگەن 100 كوشە مەن تۇيىق كوشەلەرگە سىرتقى جارىق ورناتىلادى. ول ءۇشىن كەلەسى ايدان باستاپ كوشە شامدارىن ورناتا باستايمىز»،- دەدى اكىم.