دەنساۋلىق ساقتاۋ.
الماتى قالاسى اكىمىنىڭ مىندەتىن اتقارۋشى ەربولات دوسايەۆ تۇركسىب اۋدانى تۇرعىندارىمەن كەزدەستى. كەزدەسۋ بارىسىندا اۋداندا بوي كوتەرەتىن الەۋمەتتىك ماڭىزدى نىساندار جايلى ايتىلدى، دەپ حابارلايدى Almaty-akshamy.kz.
دەنساۋلىق ساقتاۋ ينفراقۇرىلىمىن دامىتۋ جانە تۇركسىب اۋدانىنىڭ كوبەيىپ جاتقان تۇرعىندارىن مەديسينالىق قىزمەتتەرمەن قامتاماسىز ەتۋ ءۇشىن بيىل جەلتوقسان ايىندا «نۇرشاشقان» شاعىناۋدانىندا ءبىر اۋىسىمدا 100 ادامدى قابىلدايتىن دارىگەرلىك امبۋلاتوريانىڭ قۇرىلىسى باستالادى.
سونداي-اق 2023 جىلدىڭ I توقسانىندا ايباسوۆ كوشەسىندە ءبىر اۋىسىمدا 200 ادامدى قابىلدايتىن دارىگەرلىك امبۋلاتوريا سالۋ جوسپارلانعان.
«قايرات شاعىناۋدانىندا 340 كەلۋشىگە ارنالعان ەمحانا قۇرىلىسىنىڭ جوبالاۋ-سمەتالىق قۇجاتتاماسى 2023 جىلدىڭ II توقسانىندا مەملەكەتتىك ساراپتامادان وتەدى. جالپى، جوعارىدا اتالعان شارالار كۇنىنە كەلەتىن پاسيەنتتەردىڭ سانىن 800 ادامعا دەيىن ارتتىرۋعا مۇمكىندىك بەرەدى»، - دەدى ە.دوسايەۆ.
الەۋمەتتىك جانە سپورتتىق نىساندار
قازىرگى ۋاقىتتا ەسكى عيماراتتى (ر.زورگە كوشەسى، 2ا) كۇردەلى جوندەۋ ءۇشىن جوبالاۋ-سمەتالىق قۇجاتتاما ازىرلەنۋدە، وندا 2023 جىلى الەۋمەتتىك نىساندار ورتالىعىن اشىپ، «باقىتتى وتباسى» الەۋمەتتىك ورتالىعىن، «شىڭعا ورلەۋ» الەۋمەتتىك كلۋبىن، ارداگەرلەر كەڭەسىن جانە مۇگەدەكتەر قوعامىن ورنالاستىرۋ جوسپارلانعان.
سونداي-اق 2023 جىلدىڭ I توقسانىندا «جاس قانات» شاعىناۋدانىندا باسسەينى بار ەكىنشى دەنە شىنىقتىرۋ-ساۋىقتىرۋ كەشەنى اشىلادى.
2023 جىلدىڭ II توقسانىندا «اۆياتور» ستاديونىنىڭ اۋماعىندا (مايلين كوشەسى بويىندا) دەنە شىنىقتىرۋ-ساۋىقتىرۋ ورتالىعىنىڭ جوبالاۋ-سمەتالىق قۇجاتتاماسىن ازىرلەۋدى اياقتاۋ جوسپارلانعان.