تۇركسىب اۋدانىندا ينجەنەرلىك ينفراقۇرىلىمدى جاڭعىرتۋ باعدارلاماسى بەلسەندى تۇردە جۇزەگە اسىرىلىپ جاتىر. اقان سەرى - شولوحوۆ - سەيفۋللين كوشەسىنىڭ اۋماعىندا سۋ قۇبىرى مەن كارىز جۇيەسىنىڭ قۇرىلىسىن قامتيتىن ۇلكەن جوبا باستالدى. وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرىندا اۋدان اكىمى وسى جۇمىستىڭ اياق الىسىن باياندادى.
جوبا اياسىندا 18،8 شاقىرىم سۋ قۇبىرى جەلىسى (ونىڭ ىشىندە 6،7 شاق ماگيسترالدىق جانە 12،1 شاق ابونەنتتىك جەلى) جانە 27،9 كم كارىز جەلىسى (15،7 كم ماگيسترالدىق جانە 12،2 كم ابونەنتتىك جەلى) سالىنادى. بۇل جوبا 1200 ابونەنتكە ساپالى كوممۋنالدىق قىزمەت كورسەتۋگە مۇمكىندىك بەرمەك. قازىلعان 50 مىڭ شارشى مەتر الاڭداعى اسفالت جابىنى قالپىنا كەلتىرىلەدى. قۇرىلىس جۇمىسى 15 ايعا سوزىلادى.
وسى جىلدىڭ سوڭىنا دەيىن «نيجنيايا پياتيلەتكا»، «قايرات» شاعىن اۋداندارىندا، سونداي-اق قراسنوگورسكايا، ءسۇيىنباي كوشەسى مەن اسىلبەكوۆ–سوبوليەۆ-سارىمولدايەۆ اۋماعىندا 143،4 شاقىرىم سۋ قۇبىرى مەن 53،1 شاقىرىم كارىز جەلىسىنىڭ قۇرىلىسى اياقتالادى.
بۇعان قوسا، تۇقاي - نوريلسكيي - پوددۋبنىي - ديكسون كوشەسىنىڭ اۋماعىندا 9،4 شاقىرىم سۋ قۇبىرى مەن 1،1 شاقىرىم كارىز جەلىسىنىڭ قۇرىلىسى جالعاسىپ جاتىر، بۇل 2026 جىلدىڭ مامىر ايىندا اياقتالادى. سونىمەن قاتار جاڭا جوبالار دا ازىرلەنىپ جاتىر: «نيجنيايا پياتيلەتكا» شاعىن اۋدانىندا ەكى كارىزدىك سورعى ستانسياسىنىڭ قۇرىلىسى جوسپارلانىپ، جۇمىس 2025 جىلدىڭ جەلتوقسانىندا اياقتالماق. رىسقۇلوۆ - جانسۇگىروۆ - شولوحوۆ - سەيفۋللين كوشەسىنىڭ اۋماعىندا جەلى قۇرىلىسىنا وڭ ساراپتاما قورىتىندىسى الىنعان، ال «نۇرشاشقان» شاعىن اۋدانىنداعى قامتىلماعان اۋماقتارعا جوبا ازىرلەنىپ جاتىر، ونى بيىلعى قاراشادا اياقتاماقشى.
«ءقازىر ءبىز سۋ قۇبىرى مەن كارىز جۇيەلەرىن جاڭارتۋ مەن سالۋ جاعىنا ەرەكشە كوڭىل ءبولىپ وتىرمىز. الداعى جىلدارى، اسىرەسە جەكە تۇرعىن ءۇي قۇرىلىسى ورنالاسقان اۋماقتاردى ورتالىقتاندىرىلعان كارىز جۇيەسىمەن تولىق قامتۋدى كوزدەپ وتىرمىز. قازىرگى ۋاقىتتا تۇركسىب اۋدانىندا بەس جوبا ىسكە اسىپ جاتىر. الداعى 3-4 جىلدا اۋدانىمىزداعى 25 مىڭ جەكە تۇرعىن ءۇي سۋمەن، كارىز جۇيەسىمەن قامتاماسىز ەتىلەدى»، – دەدى باقىتجان اقجاروۆ.
وسىلايشا، تۇركسىب اۋدانىندا ينجەنەرلىك جەلىلەردى جاڭعىرتۋ جۇمىستارى قارقىندى جۇرگىزىلىپ، مىڭداعان تۇرعىن ءۇشىن ساپالى كوممۋنالدىق قىزمەتتىڭ كەپىلىنە اينالماق.