تۇركسىب اۋدانى تۇرعىن ءۇي قورىن وڭالتۋدى كوزدەيتىن ۇلكەن باعدارلامانى ىسكە اسىرا باستادى. اۋدانداعى 582 ءۇي توزعان دەپ تانىلىپ، ولاردى بىرتىندەپ بۇزىپ، ورنىنا وسى زامانعى كوپقاباتتى تۇرعىن ءۇي سالماق. 8 نەگىزگى اۋماقتى قامتيتىن باعدارلامانى ۇلكەن قۇرىلىس كومپانيالارىمەن بىرلەسىپ قولعا العان. وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى بارىسىندا تۇركسىب اۋدانىنىڭ اكىمى باقىتجان اقجاروۆ وسىلاي دەدى.
رەنوۆاسيا بەلسەندى ءجۇرىپ جاتقان ۋچاسكەنىڭ ءبىرى – ساۋرانبايەۆ – مولداعالييەۆ – تولستوي – چەرنىشيەۆسكيي كوشەلەرى اراسىنداعى اۋماق. مۇندا ەسكى 3 ءۇي بۇزىلىپ، ورنىنا 152 پاتەردەن تۇراتىن 7 جاڭا كوپقاباتتى تۇرعىن ءۇي سالىندى، ونىڭ 37ء-سى تۇرعىنداردى كوشىرۋ باعدارلاماسى اياسىندا بەرىلدى. جاقىن ارادا تاعى ەكى ءۇيدى بۇزىپ، سەگىز جاڭا تۇرعىن ءۇي سالماق.
«ءقازىر، مىسالى، ءبىز «يستوريا» تۇرعىن ءۇي كەشەنىنىڭ قۇرىلىس الاڭىندا تۇرمىز. بۇل كۆارتالدا ەكى-اق ەسكى ءۇي قالدى. ءبىر ءۇيدىڭ تۇرعىندارىن تۇگەل كوشىردىك. ەكىنشىسىمەن رەنوۆاسيا باعدارلاماسىنا قاتىسۋ شارتى بويىنشا كەلىسسوز جۇرگىزىپ جاتىرمىز. بۇعان دەيىن وسىنداعى ۇيلەر ءسۇرىلىپ، ورنىنا جاڭا ۇيلەر سالۋدى باستاعانبىز. سالىنعان ءۇيدىڭ ءبارى ەسكى تۇرعىن ۇيلەردى وڭالتۋ جوباسى اياسىندا بوي كوتەرىپ جاتىر»، – دەدى باقىتجان اقجاروۆ.
2021 جىلدان بەرى باعدارلاما اياسىندا تۇركسىب اۋدانىندا 28 ەسكى ءۇي بۇزىلىپ، ورنىنا 17 وسى زامانعى كوپقاباتتى تۇرعىن ءۇي سالىندى.
بۇگىندە 500-دەن استام مەنشىك يەسى جاڭا، جايلى ءارى قاۋىپسىزدىك جانە ساپا تالاپتارىنا ساي كەلەتىن پاتەرلەرگە كوشىرىلدى.
«ايسۇلتان» حولدينگتىك كومپانياسى ديرەكتورىنىڭ ورىنباسارى ەرگەن بەكتۇروۆتىڭ ايتۋىنشا، كوشىرۋ باعدارلاماسىنا قاتىسقان تۇرعىنداردىڭ جاعدايى ەداۋىر جاقسارعان.
«ءبىز كەز كەلگەن جاعدايدا تۇرعىندارعا ۇلكەنىرەك باسپانا بەرەمىز. بولمەنىڭ سانى بويىنشا الادى، زاڭ بويىنشا. بۇرىنعى ۇيلەر باراك بولعان، ەڭ ۇلكەنى – 46 شارشى مەتر. كەي تۇرعىندار ونى 3-4 بولمەگە ءبولىپ پايدالانعان. ءبىز سول بولمەنىڭ سانىنا قاراي پاتەر بەرەمىز. مىسالى، ءبىزدىڭ كەشەندە ءبىر بولمەلى پاتەردىڭ ءوزى 33 شارشى مەتردەن باستالادى. ەگەر تۇرعىننىڭ ەكى بولمەلى پاتەرى بولسا، ءبىز وعان ەكى بولمەلى پاتەر ۇسىنامىز، ول كەمىندە 56 شارشى مەتر»، – دەدى ول.
الداعى ۋاقىتتا تۇركسىب اۋدانىندا تاعى 181 جاڭا ءۇي سالىنىپ، قالادا قوسىمشا 5640-تان استام پاتەر پايدا بولادى.
تۇركسىب اۋدانىنداعى رەنوۆاسيا باعدارلاماسى تۇرعىنداردىڭ ءومىر ساپاسىن ارتتىرىپ، ەسكى ۇيلەردەن ارىلۋعا باعىتتالعان.