تۇركسىب اۋدانى الەۋمەتتىك ينفراقۇرىلىمدى دامىتۋدى جالعاستىرىپ جاتىر. تەك 2024-2026 جىلدار ارالىعىندا ءبىلىم بەرۋ، دەنساۋلىق ساقتاۋ مەن مادەنيەت سالاسىندا 25-كە جۋىق ۇلكەن جوبانى جۇزەگە اسىرماق. وڭىرلىك كوممۋنيكاسيالار قىزمەتىندە اۋدان اكىمى باقىتجان اقجاروۆ وسىلاي دەپ مالىمدەدى، دەپ حابارلايدى aqshamnews.kz
اكىمنىڭ ايتۋىنشا، مەكتەپتەگى ورىن تاپشىلىعىن ازايتۋ ءۇشىن 2024 جىلى №59 مەكتەپ-گيمنازياسىن 300 ورىنعا كەڭەيتۋ مەن №83 مەكتەپ-گيمنازياسىنىڭ بولىمشەسىن جاڭارتۋ جۇمىسى اياقتالىپ، جىل باسىندا №195 مەكتەپكە 450 ورىندىق قوسىمشا عيمارات سالىنعان. سونىمەن قاتار، «كەلەشەك مەكتەپ» ۇلتتىق جوباسى اياسىندا 6100 ورىندىق ءتورت جاڭا مەكتەپتىڭ قۇرىلىسى ءجۇرىپ جاتىر. بۇدان بولەك، الماتى تەلەكوممۋنيكاسيالار جانە ماشينا جاساۋ كوللەدجىنىڭ جاڭا عيماراتى سالىنىپ، ەسكىسى بۇزىلادى (قۇرىلىس جۇمىسى 2026 جىلدىڭ قاڭتارىندا اياقتالادى). №50 مەكتەپتى سەيسميكالىق جاعىنان كۇشەيتۋ مەن كۇردەلى جوندەۋ جۇمىسى بيىلعى جەلتوقسانعا دەيىن اياقتالسا، №59 مەكتەپ-گيمنازياسىنىڭ بولىمشەسىن جاڭارتۋدى بيىلعى تامىزعا دەيىن بىتىرمەك.
ءقازىر جوبالاۋ كەزەڭىندە تۇرعاندار: №198 مەكتەپكە 600 ورىندىق، №170 مەكتەپكە 125 ورىندىق قوسىمشا قۇرىلىس، №78 مەكتەپ-گيمنازياسىن جاڭارتۋ مەن 450 ورىندىق قوسىمشا عيمارات، №142 مەكتەپتىڭ جاڭارتۋ جۇمىسى، №89 مەكتەپتى بۇزۋ مەن جاڭا مەكتەپ سالۋ، №84 مەكتەپتىڭ رەكونسترۋكسياسى مەن №74 مەكتەپتىڭ تولىقتاي جاڭادان سالۋ بار.مەكتەپكە دەيىنگى ءبىلىم بەرۋ سالاسىندا №70 بالاباقشانى سەيسموكۇشەيتۋ جۇمىستارى اياقتالدى. 2025 جىلدىڭ قىركۇيەگىندە «قايرات» شاعىن اۋدانىندا 260 ورىندىق جاڭا مەملەكەتتىك بالاباقشا اشىلادى. سونداي-اق، №119 بالاباقشانىڭ رەكونسترۋكسياسى مەن «المەرەك» شاعىن اۋدانىندا 240 ورىندىق جاڭا بالاباقشا قۇرىلىسىنا جوبالىق-سمەتالىق قۇجاتتاما ازىرلەنىپ جاتىر. «جاس قانات» اۋدانىنداعى ەسكى بالاباقشانىڭ بىتپەگەن قۇرىلىسىن الىپ تاستاپ، ونىڭ ورنىنا 320 ورىندىق جاڭا بالاباقشا سالىنباق. بۇل جوباعا قاتىستى جوبالىق-سمەتالىق قۇجاتتاما بايقاۋى بيىلعى تامىزدا جاريالانادى.
دەنساۋلىق ساقتاۋ سالاسىندا دا وڭ وزگەرىس بايقالادى: 2024 جىلى «نۇرشاشكان» شاعىن اۋدانىندا 100 ورىندىق دارىگەرلىك امبۋلاتوريا سالىنىپ ءبىتتى. جاقىن ارادا «جۇلدىز» شاعىن اۋدانىنداعى №20 ەمحانا كۇردەلى جوندەۋدەن كەيىن قايتا اشىلىپ، قىركۇيەكتە ايباسوۆ كوشەسىندەگى 200 ورىندىق وتباسىلىق دارىگەرلىك امبۋلاتوريا جۇمىسىن باستاماق. 2026 جىلدىڭ ءبىرىنشى توقسانىندا №4 قالالىق اۋرۋحانانىڭ قابىلداۋ ءبولىمىنىڭ رەكونسترۋكسياسى اياقتالادى. بيىلعى تامىز ايىندا نامانگان كوشەسىندە 500 ورىندىق جاڭا ەمحانانىڭ قۇرىلىسى باستالىپ، ەسكىسىن تۇگەل بۇزىپ تاستايدى.
ءقازىر «رۆ90» مەن «المەرەك» شاعىن اۋدانىندا 200 ورىندىق ەكى وتباسىلىق دارىگەرلىك امبۋلاتوريانىڭ قۇرىلىسىنا جوبالىق قۇجاتتاما ازىرلەنىپ جاتىر، «قايرات» شاعىن اۋدانىندا 340 ورىندىق جاڭا ەمحانا، №24 ەمحانا مەن تۋبەركۋلەز جانە پۋلمونولوگيا ورتالىعىن كۇردەلى جوندەۋ، سونداي-اق №8 قالالىق اۋرۋحانانىڭ جاڭارتۋ جوبالارى ازىرلەنىپ جاتىر.
«سونىمەن قاتار، سپورتتىق جانە مادەني ينفراقۇرىلىمدى دامىتۋعا دا ايتارلىقتاي كوڭىل ءبولىنىپ وتىر. 2025 جىلدىڭ اقپان ايىندا «جاس قانات» اۋدانىندا 600 ورىندىق دەنە شىنىقتىرۋ-ساۋىقتىرۋ كەشەنى اشىلدى. ءقازىر مايلين كوشەسىندە ورنالاسقان «اۆياتور» سپورت كەشەنىنىڭ جوباسى ازىرلەنۋدە، ونىڭ مەملەكەتتىك ساراپتاما قورىتىندىسى 2025 جىلدىڭ تامىزىندا شىعىپ قالادى. سول ايدا «جاس قانات» شاعىن اۋدانىندا دامۋ جانە شىعارماشىلىق ورتالىعىنىڭ قۇرىلىسى باستالىپ، №6 مەكتەپ وقۋشىلارىنىڭ ءۇيىن كۇردەلى جوندەۋدەن وتكىزۋ جاعى جوسپارلانعان»، - وتمەتيل باقىتجان اقجاروۆ.
دامۋ باعدارلاماسى تۇرعىنداردىڭ ءومىر ساپاسىن جاقسارتىپ، ءبىلىم بەرۋ، مەديسينا مەن مادەني-دەمالىس قىزمەتىنىڭ ساپاسىن ارتتىرۋعا باعىتتالعان.