تۇركسىب اۋدانىندا ەسكىرگەن 126 ءۇيدى بۇزىپ، ونىڭ ورنىنا جاڭادان 181 كوپقاباتتى تۇرعىن ءۇي سالىنادى. تۇركسىب اۋدانىنىڭ اكىمى باقىتجان اقجاروۆ وڭىرلىك كوممۋنيكاسيالار قىزمەتىندە وسىلاي دەپ مالىمدەدى، دەپ حابارلايدى aqshamnews.kz
اۋدان باسشىسىنىڭ ايتۋىنشا، اۋدان جاقسى قالالىق ورتا قالىپتاستىرۋ ءۇشىن جۇيەلى جۇمىس ىستەي باستاعان: تۇرعىن ءۇي قورى جاڭارتىلىپ، قوعامدىق كەڭىستىكتەر اباتتاندىرىلىپ، ينفراقۇرىلىم جاڭعىرتىلىپ جاتىر. ەسكى ۇيلەردى جاڭالاۋ – وسى ىستەگى ەڭ باستى مىندەتتىڭ ءبىرى بولىپ قالىپتى.
ءقازىر 8 جەردە قۇرىلىس جۇمىسى ءجۇرىپ جاتىر. 28 ەسكى ءۇيدىڭ ورنىنا 17 جاڭا ءۇي سالىنىپ، 500-دەن استام تۇرعىن جاڭا پاتەرگە كوشكەن.
اكىمنىڭ ايتۋىنشا، وڭالتۋعا ارنالعان ايماقتاردى دامىتۋعا ەرەكشە كوڭىل ءبولىنىپتى. شىلدە ايىندا ۇلكەن الماتى كانالىندا قايتا قۇرۋ جۇمىسى باستالدى. مۇندا دەمالىس ايماقتارى، جاعاجاي الاڭدارى سالىنىپ، جاياۋ جۇرگىنشىلەردىڭ كوپىرى جاڭارتىلىپ جاتىر. ەندى جىلدىڭ سوڭىنا دەيىن باۋم توعايى مەن كىشى الماتى وزەنىنىڭ بويىنداعى جاياۋ جۇرگىنشىلەردىڭ ايماعىن اباتتاندىرۋدى قولعا الماقشى.
«حالىق قاتىساتىن بيۋدجەت» جوباسى اياسىندا 2024 جىلى تۇركسىب اۋدانىندا 2 ميلليارد تەڭگەدەن استام قارجىعا 52 جوبا جۇزەگە استى. 2025 جىلى تاعى 32 جوبانى ىسكە اسىرماق.
«سونىمەن قاتار، اۋداندا 850 مەتر ارىق جۇيەسىنىڭ كۇردەلى جوندەۋ جۇمىستارى جوسپارلانعان (13 ۋچاسكەدە). جاسىل-جەلەكتەرگە كۇتىم جاساۋ جاعى دا ەسكەرىلگەن. 2025 جىلى 20 000 اعاشتى كەسىپ، 4740 اعاشتى قالىپقا كەلتىرىپ، 2800 اعاشتى كەسۋدى جوسپارلاپ قويدىق»، - دەدى اۋدان اكىمى.