الماتىدا قاتەرلى ىسىكتەن بولاتىن ءولىم ازايدى

وتكەن جىلمەن سالىستىرعاندا ءولىم كورسەتكىشى 11،9%-عا تومەندەگەن

الماتى قالاسىندا ونكولوگيالىق ناۋقاستاردى مامانداندىرىلعان ەمدەۋمەن جوعارى قامتۋ، سونداي-اق قاتەرلى اۋرۋلاردى ەرتە دياگنوستيكالاۋدىڭ ارتۋى ارقاسىندا ونكولوگيالىق اۋرۋلاردان ءولىم-جىتىم جىل سايىن ازايىپ كەلەدى. ماسەلەن، وتكەن جىلمەن سالىستىرعاندا ءولىم كورسەتكىشىنىڭ 11،9%-عا (96 جاعدايعا) تومەندەۋى بايقالدى، دەپ حابارلايدى Almaty-akshamy.kz.

ءولىم كورسەتكىشتەرى بويىنشا العاشقى بەستىك كەلەسىدەي: 1-ورىندا – وكپە ىسىگى، 211 جاعداي؛ 2-ورىندا – توق ىشەك وبىرى، 172 جاعداي؛ 3-ورىندا – اسقازان ىسىگى، 155 جاعداي؛ 4-ورىندا – ءسۇت بەزى وبىرى، 139 جاعداي جانە 5-ورىندا – ۇيقى بەزىنىڭ وبىرى، 90 جاعداي.

الماتىعا ناۋقاستار قازاقستاننىڭ باسقا ايماقتارىنان جانە كورشىلەس ەلدەردەن الماتى ونكولوگيالىق ورتالىعىندا جوعارى ساپالى مەديسينالىق كومەك الۋ جانە ۇزدىكسىز تولىققاندى دارى-دارمەك (حيميوتەراپيا) الۋ ءۇشىن كەلەتىنىن ەسكەرۋ كەرەك. بۇل ءولىم-جىتىم دەڭگەيىنە دە اسەر ەتەتىنى ءسوزسىز.

وتكەن جىلدىڭ وزىندە مەگاپوليسكە 954 ناۋقاس كەلسە، 2021 جىلى بۇل كورسەتكىش 803 بولعان. بۇل سىرتتان كەلگەن ناۋقاستار سانىنىڭ جىل سايىن ارتىپ كەلە جاتقانىن كورسەتەدى. سونىڭ ىشىندە ءاربىر ءتورتىنشى ناۋقاس، اۋرۋدىڭ اسقىنعان ساتىسىمەن كەلگەن (254 ناۋقاس).

اتالعان ونكولوگيالىق ناۋقاستاردى ەمدەۋ قالانىڭ دەنساۋلىق ساقتاۋ سالاسىنا جۇمسالاتىن شىعىنى بولىپ تابىلاتىنى ءسوزسىز جانە قازاقستان رەسپۋبليكاسى دەنساۋلىق ساقتاۋ مينيسترلىگى مەن الەۋمەتتىك مەديسينالىق ساقتاندىرۋ قورىنان قوسىمشا قارجىلاندىرۋدى تالاپ ەتەدى.