نەگىزگى ماقسات – تۋريستەردى تارتۋ، كاسىپكەرلىكتى دامىتۋ.
تۇركىستاننىڭ مادەني-رۋحاني ورتالىعىندا قولونەرشىلەر شەبەرحاناسى بار تەڭدەسسىز تۋريستىك كەشەن سالىنادى، دەپ حابارلايدى Almaty-akshamy.kz وبلىستىق اكىمدىككە سىلتەمە جاساپ.
قازىرگى جوسپارعا سايكەس، كەشەندە ۇلتتىق ناقىشتاعى بىرەگەي قولونەر بۇيىمدارىن دايارلايتىن جانە قولونەر تەحنولوگياسىن وقىتاتىن ءىرى شەبەرحانا سالىنادى.
"جاڭا جوبا تۇركىستان وبلىسىنىڭ اكىمى دارحان ساتىبالدىنىڭ توراعالىعىمەن وتكەن باسقوسۋدا تالقىلاندى. قولونەرشىلەر قالاشىعىنىڭ جالپى اۋماعى – 9 مىڭ شارشى مەتر. بۇل جوبا ءالى دە تەرەڭ تالقىلانىپ، ءتيىستى شەشىم قابىلدانادى"، - دەيدى اكىمدىك ماماندارى.
سونداي-اق، جاڭا قالاشىقتا قوناقۇيلەر مەن اس ۇيلەر سالىنادى. كورمە نەمەسە Showroom ورنالاسادى. الداعى ۋاقىتتا وڭىردە قولونەرشىلەرگە قولداۋ كورسەتۋ ارقىلى جۇمىس ورىندارىن اشۋ، ءتۋريزمدى دامىتۋ شارالارى دا جوسپارلانىپ وتىر.