مىندەتىنە ءمىن كەلتىرگەن مەديسينا قىزمەتكەرى

جۋىردا الماتى قالاسىنداعى تەرگەۋ يزولياتورىنا شاقىرتۋ بويىنشا كەلگەن "جەدەل جاردەم" فەلدشەرى وزىمەن بىرگە تىيىم سالىنعان زاتتار الا كەلگەن.

الماتىدا تەرگەۋ يزولياتورىنا تەلەفون تاسىعان فەلدشەر ۇستالدى، دەپ حابارلايدى اlmaty-akshamy.kz Polisia.kz-كە سىلتەمە جاساپ.

– ق ر قك-نىڭ 188-بابىنىڭ 3-بولىگىمەن (بىرنەشە رەت ۇرلىق جاساۋ) سوتتالعان 41 جاستاعى جىگىتكە "جەدەل جاردەم" شاقىرتىلعان بولاتىن. جەدەل كومەك كورسەتۋ ءۇشىن كەلگەن "جەدەل جاردەم" بريگاداسىن تەكسەرۋ كەزىندە ر. اتتى فەلدشەردەن ءارتۇرلى ماركاداعى 4 تەلەفون مەن 145 مىڭ اقشا تابىلدى، – دەپ حابارلايدى الماتى قالاسى قىلمىستىق-اتقارۋ جۇيەسى دەپارتامەنتىنىڭ باسپا ءسوز قىزمەتى.

سوتتالعان ك. ەسىمدى ازامات سول كۇنى تەرگەۋ يزولياتورىنىڭ قىزمەتكەرلەرىنە «بۇيرەگىم اۋىردى» دەپ شاعىمدانعان. وعان جەدەل مەديسينالىق كومەك كورسەتۋ ءۇشىن فەلدشەرگە جەتكىزۋ كەزىندە سوتتالعان ك-نىڭ قالتاسىنان دا سەللوفانعا ورالعان ۇنتاق پەن وتكىر ءيىستى ءشوپ تابىلدى. سوت-حيميالىق ساراپتاما قورىتىندىسى بويىنشا، ونىڭ قالتاسىنان تابىلعان زاتتاردىڭ 78،66 گرامم گاشيش پەن 15،20 گرامم كەپتىرىلگەن ماريحۋانا ەكەندىگى انىقتالدى. اتالعان فاكتىلەر بويىنشا الماتى قالاسى تۇركسىب اۋداندىق پوليسيا باسقارماسىنان جەدەل تەرگەۋ توبى شاقىرتىلىپ، ءقازىر تەرگەپ-تەكسەرۋ شارالارى جۇرگىزىلىپ جاتىر.