322 پەداگوگتى ءبىلىم بەرۋ ۇيىمدارىنا جۇمىسقا قابىلداۋ كەزىندە كونكۋرس ەرەجەلەرى ساقتالماعان.
تۇركىستان وبلىسىندا 100-دەن استام پەداگوگكە تولەنگەن قارجى بيۋدجەتكە قايتارىلدى. بۇل تۋرالى تۇركىستان وبلىسىنىڭ ءبىلىم سالاسىنداعى ساپانى قامتاماسىز ەتۋ دەپارتامەنتى باسشىسىنىڭ مىندەتىن ۋاقىتشا اتقارۋشى جانار قاسىموۆا مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ ماماندارى جۇرگىزگەن زەردەلەۋ جۇمىستارىنىڭ بارىسىندا ءبىرشاما كەمشىلىك انىقتالعان.
ماسەلەن، وڭىردە 322 پەداگوگتى ءبىلىم بەرۋ ۇيىمدارىنا جۇمىسقا قابىلداۋ كەزىندە كونكۋرس ەرەجەلەرى ساقتالماعان. بۇل بويىنشا قازاقستان رەسپۋبليكاسى ءبىلىم جانە عىلىم ءمينيسترىنىڭ 2012 جىلعى 21 اقپانداعى №57 بۇيرىعىنىڭ تالاپتارىن بۇزعان 90 مەكتەپ ديرەكتورى تارتىپتىك جاۋاپكەرشىلىككە تارتىلدى.
سونداي-اق، جاراتىلىستانۋ-ماتەماتيكالىق باعىتتاعى پاندەردى اعىلشىن تىلىندە وتكىزۋ دەڭگەيىنىڭ سايكەستىگىن انىقتاۋ ماقساتىندا 228 پەداگوگتىڭ ساباعىنا زەردەلەۋ جۇمىستارى جۇرگىزىلگەن. ناتيجەسىندە 123 پەداگوگتىڭ ساباق وتكىزۋ دەڭگەيى تالاپتارعا سايكەس كەلمەۋىنە بايلانىستى قوسىمشا تولەم بيۋدجەتكە قايتارىلعان.
«تۇركىستان وبلىسىندا «مەكتەپكە دەيىنگى جانە ورتا ءبىلىم بەرۋ ۇيىمدارىن بەينەباقىلاۋ جۇيەلەرىمەن جاراقتاندىرۋ ستاندارتتارى جانە ولارعا قويىلاتىن تالاپتارعا» سايكەس كەلمەيتىن 731 مەكتەپ بار. سونىمەن قاتار، وڭىردە 149 مەكتەپتىڭ سپورت زالى جوق. 16 مەكتەپتە ينتەرنەت جەلىسى جۇمىس ىستەمەيدى. 908 مەكتەپتىڭ 800-گە جۋىعىندا سىرتقى دارەتحانالار جابىلماعان. اسىرەسە، ەلدى مەكەندەردە سۋدىڭ ۋاقىتپەن بەرىلۋى، ەلەكتر جۇيەسىنىڭ ىستەن شىعۋى، ورتالىقتاندىرىلعان كارىز جۇيەلەرىنە قوسىلماۋى سەكىلدى ماسەلەلەر بار»، - دەدى جانار قاسىموۆا.