ساراپشىلاردىڭ ايتۋىنشا، پاندەميا 3 جىلدىڭ ىشىندە 7 ميلليون ادامنىڭ ءومىرىن قيعان.
كوروناۆيرۋس ينفەكسياسى تولىق جويىلمايدى. ول ادامداردا كەزدەسەتىن ءتۇرلى اۋرۋلار سەكىلدى قالىپ قويادى. سوندىقتان ۆيرۋسپەن ءومىر ءسۇرۋدى ۇيرەنۋ قاجەت. دۇنيەجۇزىلىك دەنساۋلىق ساقتاۋ ۇيىمىنىڭ ماماندارى وسىنداي بايلامعا كەلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ساراپشىلاردىڭ ايتۋىنشا، پاندەميا 3 جىلدىڭ ىشىندە 7 ميلليون ادامنىڭ ءومىرىن قيعان. ونىڭ 2 ميلليونى ەۋروپالىقتار ەكەن. "ال ءقازىر كوۆيد-19 مۋتاسيالانعاندىقتان، ىندەت جۇقتىرعاندار ۇزاق ۋاقىت اۋىرىپ جاتىر. ءتىپتى ءولىم جاعدايلارى دا ازايماي تۇر. بۇل رەتتە ناۋقاستارعا ۆاكسينانىڭ ءۇشىنشى مولشەرىن الۋعا كەڭەس بەرۋ قيىنعا سوعۋدا"، - دەيدى شەتەلدىك دارىگەرلەر.
«ميلليونداعان ەۋروپالىقتار كوروناۆيرۋسپەن اۋىرىپ، جازىلدى. ءالى دە سىرقاتتانىپ جۇرگەندەرى بار. بۇل – كوۆيدتىڭ ۇزاققا سوزىلاتىن ءتۇرى. ءبىراق، ازىرگە ناقتى قانشا ادامدا وسى سيمپتوم بار ەكەنى بەلگىسىز. سوندىقتان بۇل وتە ماڭىزدى ماسەلە جانە نازاردان تىس قالمايدى. ۆاكسينا عانا ىندەتتىڭ قارقىنىن تومەندەتۋگە كومەكتەستى. الايدا ۆيرۋستىڭ جويىلمايتىنى انىق»، – دەدى دەنساۋلىق ساقتاۋ سالاسىنىڭ ساراپشىسى دجەففري لازارۋس.
ال ەلىمىزدە ەپيدەميولوگيالىق احۋال تۇراقتى بولعانىمەن، سوڭعى تاۋلىكتە كورسەتكىش كۇرت ءوسىپ وتىر. كەشە كوروناۆيرۋستى جۇقتىرعاندار سانى 22 بولسا، بۇگىن ناۋقاستار قاتارى ەكى ەسەگە ارتىپ، 46-عا جەتتى. دەنساۋلىق ساقتاۋ مينيسترلىگىنىڭ مالىمدەۋىنشە، 8 ادامنىڭ جاعدايى اۋىر.