شەتەلدىك جوو تاڭدايتىنداردىڭ ايتۋىنشا، ءبىلىم ساپاسىندا ايىرماشىلىق جوق.
شەتەلدە ءبىلىم الىپ جاتقان ستۋدەنتتەردىڭ وقۋىن اياقتاماي-اق ەلگە قايتۋى كوبەيگەن. ۇلتتىق ستاتيستيكا بيۋروسىنىڭ دەرەگىنشە، بىلتىردىڭ ءوزى قازاقستانعا قايتقانداردىڭ سانى 13 مىڭنان اسقان، دەپ حابارلايدى Almaty-akshamy.kz Almaty.tv-گە سىلتەمە جاساپ.
رۋستام راحىموۆ 17 جاسىندا الماتىدان اعىلشىن ەلىنە كەتكەن. لوندونداعى مەكتەپتەردىڭ ءبىرىن بىتىرگەن ول جوعارى ءبىلىمدى دە ەۋروپادا الامىن دەپ شەشىپتى. پاندەميا دەپ ەلگە ورالعان سوڭ، وقۋعا قايتا بارماعان.
«ەۋروپادا 3 جىل تۇرىپ، قازاقستاننان ارتىق ەلدىڭ جوعىن ءتۇسىندىم. بولاشاعىمدى دا وسى جەرمەن بايلانىستىرامىن. ءسوزىمنىڭ ءبارى وتىرىك سياقتى كورىنۋى مۇمكىن. ءبىراق ءوز ەلىمىزدەگى بىرنەشە سالانى دامىتۋعا ۇلەس قوسقىم كەلەدى»، – دەدى ستۋدەنت رۋستام راحىموۆ
تۇلەكتەردىڭ الدىندا ءتۇرلى تاڭداۋ تۇرعان سوڭ، ارمان قۋىپ، مۇحيت اسىپ كەتەتىندەر بار. شەتەلدىك جوو تاڭدايتىنداردىڭ ايتۋىنشا، ءبىلىم ساپاسىندا ايىرماشىلىق جوق.
«2018 جىلدىڭ قىركۇيەگىندە چەحياعا وقۋعا ءتۇستىم. العاشىندا بىلىنبەگەنىمەن، 2-3 ايدان سوڭ ءۇيدى ساعىندىم. ءبىلىم سالاسىندا ايتارلىقتاي وزگەرىس بايقامادىم. ەلىم، جەرىم عوي. الىسقا كەتىپ، الەمدى ارالاعانىم بولماسا، تۋعان جەرىم ىستىق ەكەنىن ءتۇسىندىم»، – دەدى قالا تۇرعىنى ماريا ناسريادجييەۆا.
«شەتەلدە وقىپ، ءبىراز اقشا قۇرتىپ، سوڭىندا ستۋدەنتتەردىڭ كوبى وقۋدى اياقتاماي، ەلگە كەلىپ جاتادى. ارينە، ەكونوميكالىق تۇرعىدا ايىرماشىلىق كوپ، قىمباتشىلىق بار. سوندىقتان، قازاقستاندا وقىپ-اق ەڭبەككە ارالاسۋدىڭ مۇمكىندىگى بار ەكەنىن ەسكەرۋ كەرەك»، – دەدى تۋريزم جانە قوناقجايلىلىق كافەدراسىنىڭ وقىتۋشىسى ماريا ۆەرەتەننيكوۆا.
تەك وقۋ ءۇشىن ەمەس، وزگە مەملەكەتكە جۇمىس بابىمەن كەتەتىندەر دە بار. ماسەلەن، ماركەتينگ بويىنشا ەلدە ءبىلىم الىپ، جوعارى وقۋ ورنىن ءتامامداعان فاتيما تارعامباي بىلتىر جازدا امەريكالىق كورپوراسياعا جۇمىسقا تۇرعان. دۇكەندە 3 اي مەنەدجەر قىزمەتىن اتقارعان. ارينە، تاجىريبە جيناپ، ءتىل ۇيرەنگەنى راس. ءبىراق و باستان ەلگە قايتۋدى قالاعان.
«امەريكادان جاقسى ەستەلىك قالدى. تاجىريبە جينادىم. شىنىمەن، ءومىردى كوردىم. ءبىراق بوتەن جەرگە تەز ۇيرەنە المادىم. جۇيە باسقا، تالاپ، كوزقاراس بولەك. وسىنىڭ ءبارى مەنىڭ قازاقستانعا قايتۋىما سەبەپ بولدى»، – دەدى قالا تۇرعىنى فاتيما تارعامباي.
ەلگە ورالعان وتانداستاردىڭ ايتۋىنش، مەنتاليتەت، ءتىل مەن ءومىر ءسۇرۋ قالپى وزگەشە ورتاعا ءسىڭىپ كەتۋ دە قيىن.