پرەزيدەنت قاسىم-جومارت توقايەۆ تۇركىستان وبلىسى جەتىساي اۋدانىنداعى جەكە ۇيدە بولعان ءورتتىڭ سالدارىنان كوپتەگەن ادامنىڭ قازا تابۋىنا بايلانىستى كوڭىل ايتتى، - دەپ حابارلايدى aqshamnews.kz ءتىلشىسى.
تۇركىستان وبلىسى توتەنشە جاعدايلار دەپارتامەنتىنىڭ مالىمەتىنشە، 18 قاراشادا تاڭەرتەڭ جەتىساي اۋدانىنا قاراستى العاباس اۋىلىنداعى ەكى قاباتتى جەكە تۇرعىن ۇيدەن ءورت شىققانى تۋرالى حابار تۇسكەن.
ورتسوندىرۋشىلەر كەلگەن ساتتە ءۇي تولىعىمەن ورتكە ورانعانى انىقتالعان. ءورتتى ءسوندىرۋ جانە بارلاۋ كەزىندە ۇيدەن ەس-تۇسسىز جاتقان ءۇش ادام ەۆاكۋاسيالانىپ، جەدەل جاردەم بريگاداسىنا تاپسىرىلدى.
"ءۇيدىڭ ىشىنەن 12 ادامنىڭ ءمايىتى تابىلدى، ولاردىڭ توعىزى – بالا"، – دەلىنگەن تجد حابارلاماسىندا.
كورشىلەردىڭ ايتۋىنشا، وقيعا بولعان ۇيدە قوناقتار بولعان، سەبەبى الدىڭعى كۇنى ءۇي يەلەرىندە ءىس-شارا وتكەن. ءورت 360 شارشى مەتر اۋماقتا تولىق ءسوندىرىلدى.
ءقازىر وقيعا ورنىندا بارلىق جەدەل قىزمەت جۇمىس ىستەپ جاتىر. ءورتتىڭ شىعۋ سەبەبى انىقتالىپ جاتىر، تەرگەۋ باستالدى.
ۇكىمەت پەن تۇركىستان وبلىسىنىڭ اكىمىنە زارداپ شەككەن ازاماتتاردىڭ تۋعان-تۋىستارىنا بارلىق قاجەتتى كومەك كورسەتىپ، قايعىلى وقيعانى جان-جاقتى تەكسەرۋدى تاپسىردى.