نازاربايەۆ ۋنيۆەرسيتەتىندە جوعارى ءبىلىم مەن عىلىم سالاسىنداعى حالىقارالىق ارىپتەستىكتى دامىتۋعا ارنالعان رەكتورلار فورۋمى ءوتتى. جيىنعا ەستونيا پرەزيدەنتى الار كاريس، قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك، سونداي-اق ەستونيانىڭ جەتەكشى ۋنيۆەرسيتەتتەرى رەكتورلارى ارنايى قاتىستى، - دەپ حابارلايدى Aqshamnews.kz.
فورۋم اياسىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما ءتوراعاسى – رەكتوردىڭ مىندەتىن اتقارۋشى ءسابيت سۋاتاي مەن تاللين ۋنيۆەرسيتەتىنىڭ رەكتورى تى́نۋ ۆييك ءوزارا تۇسىنىستىك تۋرالى مەموراندۋمعا قول قويدى.
مەموراندۋم اياسىندا تاراپتار مەكتەپكە دەيىنگى جانە باستاۋىش ءبىلىم بەرۋگە قاتىستى زاماناۋي پەداگوگيكالىق تاسىلدەر مەن وزەكتى ماسەلەلەردى بىرلەسە زەرتتەۋ ءۇشىن ورتاق اكادەميالىق الاڭ قۇرادى. سونىمەن قاتار، ىنتىماقتاستىق سيفرلىق تەحنولوگيالار مەن جاساندى ينتەللەكتكە نەگىزدەلگەن يننوۆاسيالىق ءبىلىم بەرۋ شەشىمدەرىن ازىرلەۋ مەن ەنگىزۋدى قامتيدى. تاراپتار ۇزاق مەرزىمدى ىنتىماقتاستىقتى قامتاماسىز ەتەتىن تۇراقتى سەرىكتەستىك جەلىسىن قالىپتاستىرۋدى كوزدەيدى.
اكادەميالىق ىنتىماقتاستىقتىڭ بولاشاق باعىتتارىن تالقىلاۋ بارىسىندا QyzPU رەكتورىنىڭ مىندەتىن اتقارۋشى ءسابيت سۋاتاي مەكتەپكە دەيىنگى ءبىلىم بەرۋ جۇيەسىن دامىتۋداعى بىرلەسكەن باستامالاردىڭ ماڭىزىن اتاپ ءوتتى.
«بۇگىنگى تالقىلاۋلار QyzPU مەن تاللين ۋنيۆەرسيتەتى اراسىنداعى ستراتەگيالىق ارىپتەستىكتى جاڭا دەڭگەيگە كوتەرەتىنىنە سەنىمدىمىن. ءبىزدىڭ بىرلەسكەن باستامالارىمىز مەكتەپكە دەيىنگى ءبىلىم ساپاسىن ارتتىرۋعا ەلەۋلى ۇلەس قوسادى»، – دەدى ول.
مەموراندۋمعا قول قويۋ ءراسىمى ەكى ۋنيۆەرسيتەت اراسىنداعى ىنتىماقتاستىقتىڭ رەسمي باستاماسى بولىپ تابىلادى جانە ءبىلىم بەرۋ سالاسىنداعى بىرلەسكەن جوبالاردى دامىتۋعا جول اشادى. ىنتىماقتاستىق اياسىندا جۇرگىزىلەتىن زەرتتەۋلەر مەن تاجىريبە الماسۋ ءبىلىم بەرۋ ساپاسىن ارتتىرۋعا، زاماناۋي پەداگوگيكالىق تاسىلدەردى ەنگىزۋگە جانە سيفرلىق تەحنولوگيالاردى قولدانۋ ارقىلى يننوۆاسيالىق شەشىمدەردى جۇزەگە اسىرۋعا باعىتتالادى.