كەنتاۋ قالاسىندا ورنالاسقان "ريزىق-راۋانى" فاست-فۋد ورتالىعىندا تاماقتان ۋلانعاندار سانى 92-گە جەتتى.
بۇل تۋرالى تۇركىستان وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسىنىڭ ورىنباسارى اسقار يسكاكوۆ مالىمدەدى، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
اتالعان تاماقتانۋ ورنىندا جاپپاي ۋلانۋ جاعدايى وسىمەن 3ء-شى رەت تىركەلىپ وتىر.
قوعامدىق تاماقتانۋ ورنىنىڭ يەسى كۇدىكتى رەتىندە تانىلىپ، ونىڭ ءىس ارەكەتىندە قىلمىستىق قۇقىق بۇزۋشىلىقتىڭ قۇرامى بار دەپ تانىلعان. دەگەنمەن، جابىرلەنۋشىلەرمەن تاتۋلاسۋىنا بايلانىستى، قىلمىستىق ءىس توقتاتىلعاندىعى جونىندە كەنتاۋ قالالىق پوليسيا ءبولىمى قاۋلى شىعارعان.
«نىسان قىزمەتكەرلەرى الدىن الا پروفيلاكتيكالىق مەديسينالىق تەكسەرۋدەن تولىق وتپەگەن. جۇمىس جاسايتىن 20 قىزمەتكەردىڭ تەك 12-دە عانا مەديسينالىق كىتاپشالارى بار. شيكىزات پەن ءونىمنىڭ قاۋىپسىزدىگىن كۋالاندىراتىن قۇجاتتارى تولىق ەمەس، ونىمدەردى ساقتاۋ كەزىندە ولاردىڭ تاۋارلىق كورشىلەستىگى ساقتالماعان، ياعني ەت ونىمدەرى، قۇس ەتى ونىمدەرى، ءسۇت ونىمدەرى، كوكونىستەر مەن جەمىستەر، بارلىعى ءبىر توڭازىتقىشتا ارالاسا ساقتالعان. قىزمەتكەرلەردىڭ جەكە جانە ارنايى كيىمدەرىن، جەكە زاتتارىن ساقتاۋعا ارنالعان ورىن قاراستىرىلماعان. جۇمىرتقانى ساقتاۋعا، جۋىپ وڭدەۋگە ارنالعان ارنايى ىدىس بولىنبەگەن، ونىمدەردىڭ جارامدىلىق مەرزىمدەرى وتكەن. زەرتحانالىق زەرتتەۋگە الىنعان سىنامالار جۇمىس ۇستىندە»، دەلىنگەن تۇركىستان وبلىسى سانيتاريالىق-ەپيدەميولوگيالىق باقىلاۋ دەپارتامەنتىنىڭ باسپا ءسوز قىزمەتى تاراتقان اقپاراتتا.