قازاقستان ەكونوميكاسىنىڭ قالاي دامىپ جاتىر؟
بۇل تۋرالى ق ر پرەمەر-مينيسترى ءاليحان سمايىلوۆ استانادا ءوتىپ جاتقان «AMANAT» پارتياسىنىڭ بارلىق دەڭگەيدەگى ءماسليحات دەپۋتاتتارىنىڭ رەسپۋبليكالىق فورۋمىندا ايتتى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
ۇكىمەت باسشىسى بۇگىنگى تاڭدا رەسپۋبليكا ەكونوميكاسى سىرتقى كەلەڭسىزدىكتەرگە بەيىمدەلىپ، تۇراقتى دامۋ جولىنا تۇسكەنىن اتاپ ءوتتى. اتاپ ايتقاندا، وتكەن جىلدىڭ قورىتىندىسى بويىنشا ەل ەكونوميكاسى 3،3%-عا وسكەن. بۇل رەتتە جۇمىس ىستەپ تۇرعان شاعىن جانە ورتا كاسىپكەرلىك نىساندارىنىڭ سانى 27%-عا كوبەيدى، وسى سەكتوردا جۇمىسپەن قامتىلعاندار سانى 18%-عا ءوسىپ، 4،1 ملن-عا جەتتى، ال ەكونوميكاداعى شوب ۇلەسى 33%-دان 36،5%-عا دەيىن ۇلعايدى.
«قابىلدانىپ جاتقان شارالار بيىل تۇراقتى ەكونوميكالىق ءوسىمدى قامتاماسىز ەتۋگە مۇمكىندىك بەردى. 5 ايدا جالپى ىشكى ءونىمنىڭ ناقتى ءوسۋى 4،5%-دى قۇرادى. بارلىق نەگىزگى سالا بويىنشا وڭ ديناميكا قالىپتاسىپ وتىر»، دەدى ءاليحان سمايىلوۆ.
ناقتى ءوسىم قۇرىلىس سالاسىندا 12%-دى، ساۋدا-ساتتىقتا 10%-دى، بايلانىس سالاسىندا 9%-دى، كولىك سالاسى بويىنشا 7%-دى، وڭدەۋ ونەركاسىبىندە 3،3%-دى قۇرادى.
«ەكونوميكالىق ءوسىم ينۆەستيسيالارمەن تىكەلەي بايلانىستى. نەگىزگى كاپيتالعا سالىنعان ينۆەستيسيالاردىڭ ناقتى كولەمى 5 ايدا 17،2%-عا ءوستى. بيىل ءبىز ەكونوميكانىڭ ءوسۋىن 4،5-5%، ال ورتا مەرزىمدى بولاشاقتا كەمىندە 6% دەڭگەيىندە كوزدەپ وتىرمىز»، دەدى پرەمەر-مينيستر.
سونىمەن قاتار ءاليحان سمايىلوۆ ۇكىمەت پەن جەرگىلىكتى اتقارۋشى ورگانداردىڭ نەگىزگى مىندەتتەرىنىڭ ءبىرى ازىق-تۇلىك باعاسىن تۇراقتاندىرۋ ەكەنىن اتاپ ءوتتى. ول ءۇشىن بۇگىندە اۋىل شارۋاشىلىعى تاۋارىن وندىرۋشىلەرمەن فورۆاردتىق كەلىسىم-شارتتار جاساسۋدى، ازىق-تۇلىك بويىنشا تۇراقتاندىرۋ قورلارىنىڭ بەلسەندى جۇمىسىن، كوكونىس قويمالارىنىڭ قۇرىلىسىن، مونوپولياعا قارسى جانە سىرتقى ساۋدانى رەتتەۋدى كوزدەيتىن ينفلياسيانى باقىلاۋ جانە تومەندەتۋ جونىندەگى شارالار كەشەنى ىسكە اسىرىلىپ جاتىر.
«ناتيجەسىندە وسى جىلدىڭ مامىر ايىندا جىلدىق ينفلياسيا 21%-دان 15،9%-عا دەيىن باياۋلادى. ءبىزدىڭ الدىمىزدا جىل سوڭىنا دەيىن ينفلياسيانى 2 ەسە تومەندەتۋ مىندەتى تۇر»، دەدى ۇكىمەت باسشىسى.
پرەمەر-مينيستر مەملەكەت باسشىسىنىڭ سايلاۋالدى تۇعىرناماسىن جانە «AMANAT» پارتياسىنىڭ باعدارلاماسىن ىسكە اسىرۋ ۇكىمەت جۇمىسىنىڭ نەگىزى ەكەنىن اتاپ ءوتتى.
«وسى باعدارلامالىق قۇجاتتاردى ءتيىمدى ىسكە اسىرۋ حالىقتىڭ ءومىر ءسۇرۋ دەڭگەيىن ارتتىرۋعا مۇمكىندىك بەرەدى. الدىمىزداعى ماقساتتارعا قول جەتكىزۋ ءۇشىن قاجەتتى رەسۋرستاردىڭ بارلىعى بار. قويىلعان مىندەتتەرگە قول جەتكىزۋ ءماسليحاتتاردىڭ دا بەلسەندى قاتىسۋىن تالاپ ەتەدى»، دەدى ءاليحان سمايىلوۆ.