بورتەگە ارنالعان تۇڭعىش شىعارما قازاق ساحناسىندا دا تۇڭعىش رەت قويىلىپ وتىر
9-10 قازاندا تۇركىستان مۋزىكالىق دراما تەاترى «بورتە» سپەكتاكلىمەن تۇڭعىش رەت شىمىلدىعىن اشادى، دەپ حابارلايدى Almaty-akshamy.kz.
قازاقپاراتتىڭ حابارلاۋىنشا، بۇل سپەكتاكل بەلگىلى دراماتۋرگ، ق ر مەملەكەتتىك سىيلىعى لاۋرەاتى دۋلات يسابەكوۆتىڭ پەساسى بويىنشا قويىلعان. بورتە - الەم تاريحىنداعى ۇلى قايراتكەرلەردىڭ ءبىرى، شىڭعىس حاننىڭ قوڭىرات تايپاسىنان العان العاشقى ايەلى.
قويىلىم 10-11 جاستاعى تەمۋچين (شىڭعىس حاننىڭ شىن ەسىمى) مەن بورتەنىڭ العاش تانىسۋىنان باستالىپ، شىڭعىس قاعاننىڭ الىپ يمپەريانى باسقارىپ تۇرعان كەزەڭىن قامتيدى.
بۇل كەزەڭدە تەمۋچين الاۋىزدىق جايلاعان موڭعول تايپالارىن ءبىرتۇتاس مەملەكەتكە بىرىكتىرىپ، شىڭعىس قاعان اتانادى. شىڭعىس حان اسكەرىنىڭ جەڭىستى جورىعى قىتايدان باستالىپ، ۋكراينادا بولعان اتاقتى «كالقا وزەنى بويىنداعى شايقاسقا» دەيىن جەتەدى. سپەكتاكلدە وجەت تە قايسار، اجارلى دا اقىلدى، باتىر دا باتىل، ءبىر باسىندا دراماسى مەن تراگەدياسى جەتىپ-ارتىلاتىن قايسار ايەل بورتە حانىمنىڭ عۇمىرى باياندالادى.
«بورتە» سپەكتاكلىن قويۋعا بەلگىلى يتاليالىق رەجيسسەر داۆيدە ليۆەرمور (Davide Livermore) شاقىرىلدى. قويىلىمنىڭ كوركەمدىك جەتەكشىسى - اينۇر كوپباساروۆا، رەجيسسەر - كارلو شاككالۋگا (Carlo Sciaccaluga)، سەنوگراف– اننا ۆارالدو (Anna Varaldo)، كوورديناتور - ەليس فەررانتي (Alice Ferranti)، دەكوراتور-سۋرەتشى - جانات كوكىمبەكوۆ، كوستيۋم بويىنشا سۋرەتشى – ايجان ابدۋايت، كومپوزيتور - حاميت شانعالييەۆ، ادەبي رەداكتور – شىنار وماروۆا، جارىق بويىنشا سۋرەتشى - داۋرەن ساماشوۆ، بالەتمەيستەر – اسەم الديبەكوۆا، مادينا مۋراتپەكوۆا، داۋلەت مۇراتپەكوۆ، گريم بويىنشا سۋرەتشى – ادەل نۇرقاسىموۆا جانە تۇركىستان مۋزىكالىق دراما تەاترىنىڭ جاس دراما اكتەرلارى جانە بالەت ارتىستەرى.
تاريحي سپەكتاكلدىڭ عىلىمي كەڭەسشىسى: تاريحشى، تاريح عىلىمدارىنىڭ كانديداتى، دوسەنت نۇرلان اتىعايەۆ. رولدەردە وينايتىن ارتىستەر: اييا ءشارىپ، اقبوتا قايماقبايەۆا، نۇركەن وتەۋىلوۆ، ەركەبۇلان دايىروۆ، لەيلو بەكنازار-حانينگا، ءادىل احمەتوۆ، الماحان كەنجەبەكوۆا، اليحان يدرىشيەۆا، ەرجان نۇرىمبەت، نارتاي ساۋدانبەك ۇلى، قونىسبەك بەگايداروۆ، زامزاگۇل بەگايداروۆ، التىناي نوگەربەك، ازامات چۋكەيەۆ، تولقىن نۇربەكوۆا، ءاشىم احمەتوۆ، قۋانىش قونىسبەكوۆ، ايگەرىم قايرات قىزى.
دەكوراسيا شىنايلىعىمەن، ساحنالىق كيىمدەر تارتىمدىلىعىمەن، رەكۆيزيتتەر شەبەرلەردىڭ ارنايى دايىنداۋىمەن ەرەكشەلەنەدى. بەلگىلى كومپوزيتور حاميت شاڭعالييەۆ سپەكتاكلگە ارناپ ەكسكليۋزيۆتى مۋزىكا جازدى. تەاتر ديرەكتورى ءارى كوركەمدىك جەتەكشىسى اينۇر كوپباساروۆانىڭ ايتۋىنشا، الداعى ۋاقىتتا دا وزىق تەحنيكالىق جانە كرەاتيۆ شەشىمدەرگە نەگىزدەلگەن تىڭ قويىلىمدار قالا تۇرعىندارى مەن قوناقتارىنا كوپتەپ ۇسىنىلاتىن بولادى.
تۇركىستان مۋزىكالىق دراما تەاترى - ق ر تۇڭعىش پرەزيدەنتى، ەلباسى ن.نازاربايەۆتىڭ قولداۋىمەن سالىنعان تۇركى الەمى استاناسىنىڭ ەڭ ساۋلەتتى عيماراتتارىنىڭ ءبىرى. 2021 جىلدىڭ مامىر ايىندا ەلباسى ارنايى كەلىپ، جاڭا تەاتردىڭ اكتەرلىق قۇرامىمەن جانە ساحنانىڭ تەحنيكالىق مۇمكىندىكتەرىمەن تانىسقان ەدى.