پرەزيدەنتتىك سايلاۋ 12 ناۋرىزعا بەلگىلەنگەن.
تۇركىمەنستاننىڭ قازىرگى مەملەكەت باسشىسى گۋربانگۋلى بەردىمۇحامەدوۆتىڭ ۇلى، تۇركىمەنستان پرەمەر-مينيسترىنىڭ ورىنباسارى سەردار بەردىمۇحامەدوۆ 12 ناۋرىزدا وتەتىن سايلاۋدا تۇركىمەنستان پرەزيدەنتتىگىنە كانديدات رەتىندە ۇسىنىلدى، دەپ حابارلايدى Almaty-akshamy.kz Interfax.ru سىلتەمە جاساپ.
ونىڭ كانديداتۋراسىن تۇركىمەنستان دەموكراتيالىق پارتياسى كەزەكتەن تىس توعىزىنشى قۇرىلتايى بارىسىندا ۇسىنعان.
«بۇگىن تۇركىمەنستاننىڭ قوعامدىق ۇيىمدار ورتالىعىندا تۇركىمەنستان دەموكراتيالىق پارتياسىنىڭ كەزەكتەن تىس IX سەزى ءوتتى. كۇن تارتىبىنە سايكەس، تۇركىمەنستان مينيسترلەر كابينەتى ءتوراعاسىنىڭ ورىنباسارى سەردار گۋربانگۋلىيەۆيچ بەردىمۇحامەدوۆتىڭ كانديداتۋراسى ۇسىنىلدى»، - دەلىنگەن حابارلامادا.
اقپاننىڭ 11ء-ى كۇنى تۇركىمەنستاننىڭ حالىق ماسلاحاتى (حالىق كەڭەسى) وتىرىسىندا 15 جىل پرەزيدەنت بولعان گۋربانگۋلى بەردىمۇحامەدوۆ جاس باسشىعا ءوز قىزمەتىن تاپسىرۋعا نيەتى ەكەنى تۋرالى مالىمدەپ، حالىق ماسلاحاتىندا (پارلامەنتتىڭ جوعارعى پالاتاسى) تەك ءتوراعالىق مىندەتىن قالدىراتىنىن ايتقان بولاتىن.
تۇركىمەنستاندا مەرزىمىنەن بۇرىن پرەزيدەنت سايلاۋى 2022 جىلدىڭ 12 ناۋرىزىنا بەلگىلەنگەن. تۇركىمەنستان كونستيتۋسياسىنا سايكەس، تۇركىمەنستاندا تۋىلعان، جاسى 40-تان كىشى ەمەس، مەملەكەتتىك ءتىلدى جەتىك مەڭگەرگەن، وسى ەلدە سوڭعى 15 جىل تۇراقتى تۇراتىن جانە جۇمىس ىستەيتىن ازامات ەل پرەزيدەنتى بولىپ سايلانا الادى.
دۇيسەنبى كۇنى سايلاۋ جانە رەفەرەندۋمداردى وتكىزۋ جونىندەگى ورتالىق كوميسسيا (وسك) سايلاۋ ناۋقانى باستالعانىن حابارلادى. اتاپ ايتقاندا، 14 اقپاننان باستاپ ساياسي پارتيالار مەن ازاماتتاردىڭ باستاماشىل توپتارى جوعارى مەملەكەتتىك لاۋازىمعا ءوز كانديداتتارىن ۇسىنۋ بويىنشا جيىندار وتكىزە باستايدى.
ءقازىر تۇركىمەنستاندا ۆيسە-پرەمەر قىزمەتىن 2021 جىلدىڭ شىلدەسىنەن بەرى قارجى-ەكونوميكالىق كەشەنگە جەتەكشىلىك ەتىپ كەلگەن پرەزيدەنتتىڭ ۇلى سەردار بەردىمۇحامەدوۆ اتقارۋدا. 2021 جىلى 22 قىركۇيەكتە ول 40 جاسقا تولدى.
2019 جىلدىڭ 17 ماۋسىمىنان باستاپ پرەزيدەنتتىڭ ۇلى تۇركىمەنستاننىڭ ورتالىق ايماعى – احال ۆەلاياتىنىڭ (وبلىسى) باسشىسى بولىپ تابىلادى. سەردار بەردىمۇحامەدوۆ 2020 جىلدىڭ 7 اقپانىنان باستاپ يندۋستريا جانە قۇرىلىس ءوندىرىسى ءمينيسترى قىزمەتىن اتقاردى.
2021 جىلدىڭ 11 اقپانىندا ول پرەمەر-مينيستردىڭ ورىنباسارى، جوعارعى باقىلاۋ پالاتاسىنىڭ ءتوراعاسى بولىپ تاعايىندالىپ، مەملەكەتتىك قاۋىپسىزدىك كەڭەسىنە تانىستىرىلدى. بۇل قىزمەتتە ول مەملەكەتتىك باسقارۋ جۇيەسىندە، قارجى-ەكونوميكالىق جانە الەۋمەتتىك سەكتوردا سيفرلاندىرۋ مەن يننوۆاسيالىق تەحنولوگيالاردى ەنگىزۋگە دە جاۋاپتى بولدى.