تۇركيانىڭ گازيانتەپ قالاسىنان ۇشىپ شىققان ارنايى رەيس استانا اۋەجايىنا قوندى.
قۇتقارۋشىلاردى اپارعان ۇشاقپەن 18 ازامات ەلگە ورالدى. ونىڭ 16-سى قازاقستاندىق، تاعى 2 ادام قىرعىز ازاماتى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
ءدۇمپۋ وشاعىنان كەلگەندەردىڭ ءبىرى - ايبوبەك ناربەك قىزى. جەرگىلىكتى كىلەم فابريكاسىندا جۇمىس ىستەيتىن وتانداسىمىز گازيانتەپتە 5 جىلدان بەرى تۇرىپ كەلگەن. جەر سىلكىنگەن ۋاقىتتا ۇيدەن قاشىپ شىعىپ، جۇمىس ورنىنا بارعان. ايتۋىنشا ءدۇمپۋدىڭ قاتتى بولعانى سونشا تۇرعىندار جەڭىل كيىممەن دالاعا شىعىپ كەتكەن. ول ءقازىر تۇركيا اۋەجايلارىندا باسقا ەلدەرگە ۇشىپ كەتىپ جاتقان ادام كوپ ەكەنىن ايتادى.
«عيماراتتار قيراپ جاتىر. سول عيماراتتىڭ استىندا قالىپ كەتكەن ارىپتەسىم بار. بۇگىن كەشكە ءولى دەنەسى تابىلدى. ءۇش سوزبەن ايتىپ جەتكىزە الامىن. ءبىرىنشىسى: تۇسىنبەۋ، تۇسىنبەيسىڭ نە بولىپ جاتقانىن. ەكىنشىسى: قورقىنىش، ءوزىڭنىڭ ومىرىڭە، جولداسىڭنىڭ ومىرىنە، جاقىندارىڭنىڭ ومىرىنە. ءۇشىنشىسى: سول جاعدايدى قابىلدايسىڭ. ەندى جەر سىلكىنىسى بىتكەننەن كەيىن قايتۋ كەرەك. جۇمىس كۇتىپ تۇر»، - دەيدى قازاقستان ازاماتى ايبوبەك ناربەك قىزى.