تۇركيادا «توميريس» ءفيلمىنىڭ پرەمەراسى ءوتتى

وتاندىق «توميريس» ءفيلمى تۇركيادا كورەرمەندەرگە جول تارتتى

ىستانبۇلدا «توميريس» ءفيلمىنىڭ تۇركياداعى پرەمەراسى ءوتتى، دەپ حابارلايدى Almaty-akshamy.kz.

تاريحي درامانىڭ باۋىرلاس ەلدەگى العاشقى كورسەتىلىمىنە ءفيلمنىڭ رەجيسسەرى اقان ساتايەۆ جانە باستى ءرولدى سومداعان اكتريسا الميرا تۇرسىن ارنايى قوناق بولدى. ەل تاۋەلسىزدىگىنىڭ 30 جىلدىعى اياسىندا ۇيىمداستىرىلعان پرەمەراعا، سونداي-اق، قازاقستاننىڭ تۇركياداعى ەلشىسى ابزال ساپاربەك ۇلى مەن ىستانبۇلداعى باس كونسۋلى ءالىم بايەل، تۇركيانىڭ ساياساتكەرلەرى، جەرگىلىكتى زيالى قاۋىم وكىلدەرى جانە ىستانبۇلداعى قازاق دياسپوراسىنىڭ وكىلدەرى قاتىستى. ۇلى دالانىڭ تاريحىن تارتىمدى تۇردە پاش ەتكەن وتاندىق ءفيلمدى جينالعان كورەرمەندەر ىستىق ىقىلاسپەن قابىل الدى. وسى رەتتە توميريس حانشايىمنىڭ تۇركيادا دا تانىمال تاريحي تۇلعا ەكەنىن، ونىڭ ەسىمىنىڭ قىزدارعا بەرىلەتىنىن ايتا كەتۋ كەرەك. اتالعان كينوتۋىندى 3 قىركۇيەكتەن باستاپ تۇركياداعى ەكى جۇزدەن استام كينوتەاترلاردا كورسەتىلىمگە شىعىپ، قالىڭ كورەرمەنگە جول تارتادى.

تاۋەلسىزدىككە ارنالعان مەركەلىك ءىس-شارالاردىڭ جالعاساتىنىن ايتقان قازاقستاننىڭ ىستانبۇلداعى باس كونسۋلى ءا. بايەل «توميريس» كينوكارتيناسىنىڭ تۇركيانىڭ مادەني ومىرىندەگى ۇلكەن وقيعاعا اينالىپ، باۋىرلاس حالىقتاردى ودان سايىن جاقىنداتا تۇسەتىنىنە دەگەن سەنىمىن ءبىلدىردى.