قازاقستاندا ۇلتتىق گەولوگيالىق قىزمەت قۇرىلادى

گەولوگيا سالاسىنا تىڭ سەرپىن بەرىلىپ جاتىر

قازاقستاندا ۇلتتىق گەولوگيالىق قىزمەت قۇرىلىپ، ينۆەستورلاردىڭ ساپالى گەولوگيالىق اقپاراتقا قولجەتىمدىلىگىن قامتاماسىز ەتۋ قاجەت. ق ر پرەزيدەنتى قاسىم-جومارت توقايەۆ قازاقستان حالقىنا كەزەكتى جولداۋىندا وسىلاي ءمالىم ەتتى، دەپ حابارلايدى Almaty-akshamy.kz. Qazaqtv.com سايتىنا سىلتەمە جاساپ.

 «باعىنىستى ۇيىمداردىڭ بازاسىندا قۇرىلاتىن جاڭا مەكەمە جەر قويناۋىنا كىمدى جانە قالاي جىبەرۋ كەرەكتىگىن شەشەتىن مونوپوليست بولماۋى كەرەك. ونىڭ ءرولى ينۆەستورلاردى كەشەندى سەرۆيستىك قولداۋعا باعىتتالعانى ءجون»، - دەدى مەملەكەت باسشىسى.

پرەزيدەنت قاسىم-جومارت توقايەۆ اتاپ كورسەتكەندەي، ءقازىر ازىرلەنىپ جاتقان ونەركاسىپتىك ساياسات تۋرالى زاڭ قايتا وڭدەۋ سالاسىنىڭ الدىندا تۇرعان سۇراقتارعا جاۋاپ بەرۋى ءتيىس. ونىڭ ەرەجەسى قاراپايىم جانە تۇسىنىكتى: وتاندىق ونەركاسىپ ءۇشىن شيكىزات تاۋارلارىنىڭ باعاسى قولجەتىمدى، كولەمى جەتكىلىكتى بولۋى قاجەت.

«ەلىمىزدىڭ رەسۋرستىق الەۋەتى تولىق اشىلماعانىن، گەولوگيالىق تۇرعىدان زەردەلەنۋ دەڭگەيى تومەن ەكەنىن قاپەردەن شىعارماعان ءجون. ساپالى گەولوگيالىق اقپاراتتىڭ ينۆەستورلارعا قولجەتىمدىلىگىن ارتتىرۋ قاجەت. جەر قويناۋىن پايدالانۋ سالاسىنا، اسىرەسە گەولوگيالىق بارلاۋ جانە جەر قويناۋىن كەشەندى زەرتتەۋ ىسىنە تىڭ سەرپىن قاجەت. ۇلت جوسپارى اياسىندا باستالعان رەفورمالاردى سوڭىنا دەيىن جەتكىزگەن ءجون. اتاپ ايتقاندا، گەولوگيالىق اقپاراتتىڭ اشىق سيفرلىق مالىمەتتەر بازاسىن قۇرىپ، ونى ينۆەستورلار ءۇشىن قولجەتىمدى ەتۋ كەرەك. جەر قويناۋى – ۇلتتىڭ بايلىعى»، - دەدى پرەزيدەنت.