ءزىلزالا وشاعى 7 شاقىرىم تەرەڭدىكتە ورنالاستى
تۇركيانىڭ كاحرامانماراش پروۆينسياسىندا قۋاتى 4،7 ماگنيتۋداسىمەن جەر سىلكىنىسى تىركەلدى. بۇل تۋرالى تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە سالدارىن جويۋ باسقارماسىنان (AFAD) ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
جەراستى ءدۇمپۋى جەرگىلىكتى ۋاقىتپەن 09:47-دە گوكسۋن اۋدانىندا تىركەلدى. ءزىلزالا وشاعى 7 شاقىرىم تەرەڭدىكتە ورنالاستى.
قازا تاپقاندار مەن قيراعان عيماراتتار تۋرالى اقپارات تۇسكەن جوق.
ەسكە سالايىق، 6 اقپاندا تۇركيانىڭ كاحرامانماراش پروۆينسياسىندا قۋاتى 7 بالدان اساتىن ەكى جەر سىلكىنىسى بولدى. تەربەلىس ەلدىڭ 10 پروۆينسياسىندا، سونداي-اق كورشىلەس مەملەكەتتەردە، سونىڭ ىشىندە سيريادا سەزىلدى.
ماماندار ايماقتا جەراستى دۇمپۋلەرى ءالى دە جارتى جىل بويى جالعاسادى دەگەن بولجام جاسادى. تۇركيادا جويقىن ءزىلزالا بولاتىنىن بولجاعان نيدەرلاند زەرتتەۋشىسى فرانك حۋگەربيتس ناۋرىز ايىنىڭ باسىندا جاڭا اپاتتار كۇتىلەتىنىن ەسكەرتتى.
7 ناۋرىزدا تۇركيانىڭ حاتاي، كاحرامانماراش جانە كايسەري پروۆينسيالارىندا ءۇش جەر سىلكىنىسى بولدى.