تۇركيادا تاعى ءبىر قازاقستاندىقتىڭ دەنەسى تابىلدى

10 اقپاندا تۇركيانىڭ وڭتۇستىك-شىعىسىنداعى كاحرامانماراش قالاسىندا قۇتقارۋ-ىزدەستىرۋ جۇمىسى بارىسىندا ايەلدىڭ دەنەسى تابىلدى.

الماتىدان كەلگەن تۋىستارى ونى قازاقستان ازاماتى جانار جاقسىبەكوۆا دەپ تانىدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«قازاقستاندىق ديپلوماتتار قازا تاپقان وتانداسىمىزدىڭ دەنەسىن كاحرامانماراشتان انتالياعا جانە ودان ءارى الماتىعا جەتكىزۋگە، سونداي-اق قاجەتتى قۇجاتتاردى رەسىمدەۋگە بارىنشا جاردەم كورسەتتى. بۇگىن ءمايىت تالدىقورعان قالاسىنا جەتكىزىلدى»، - دەپ مالىمدەدى سىرتقى ىستەر مينيسترلىگى.

تاسىمالداۋ بويىنشا بارلىق شىعىندى مەملەكەت ءوز موينىنا الدى.

سونىمەن قاتار، Pegasus تۇرىك اۆياكومپانياسى قازا تاپقان ق ر ازاماتىنىڭ بىرگە كەلگەن تۋىستارىنا 90 پايىزدىق جەڭىلدىك بەرەتىن بولدى.

ەسكە سالا كەتەيىك، بۇعان دەيىن ءسىم رەسمي وكىلى ايبەك سمادياروۆ كاحرامانماراشتا تاعى ءبىر قازاقستاندىق ىزدەستىرىلىپ جاتقانىن حابارلاعان ەدى.

«ول وسى جىلدىڭ 6 اقپانىنان بەرى بايلانىسقا شىقپادى، تۇراتىن جەرى - كاحرامانماراش قالاسى. اپكەسى مينيسترلىكتىڭ «جەدەل جەلىسىنە» حابارلاسقاننان كەيىن ونى ىزدەۋ جۇمىستارىن باستادىق. قازىرگى ۋاقىتتا قازاقستان ەلشىلىگىنىڭ قىزمەتكەرى وسى قالاعا بارىپ، تۇرىك قۇتقارۋشىلارىمەن بىرلەسىپ ونى ىزدەستىرۋدە. كورشىلەردىڭ ايتۋىنشا، ءۇي قيراعان كەزىندە ونىڭ ىشىندە بولعان»، - دەدى ايبەك سمادياروۆ.