"جاقسى ادام - ەل ىرىسى، جاڭبىر جاۋسا - جەر ىرىسى" دەگەن ەكەن دانا حالقىمىز. قازاق سپورتىنىڭ دامۋىنا زور ۇلەسىن قوسقان تاۋ تۇلعالى ازاماتتار كوپ ەكەنىن بىلەمىز. سولاردىڭ ىشىندە باسشىلىق قىزمەتتە ءجۇرىپ، قولىنان كەلگەن جاقسىلىعىن قازاق سپورتىنىڭ وركەندەۋىنە، كەشەندى عيراتتاردىڭ بوي كوتەرۋىنە سۇبەلى ۇلەسىن قوسقان ءىرى تۇلعانىڭ ءبىرى كاركەن احمەتوۆ دەپ ايتار ەدىك.
ول كىسىنىڭ تىكەلەي باسشىلىعىمەن الماتىدا ورتالىق ستاديون، مەدەۋ مۇز ايدىنى مەن قوسا كوپتەگەن سپورت عيمراتتارى سالىنعانىن بىرەۋ بىلسە، بىرەۋ بىلمەس. سونىمەن قاتار، كاركەن احمەت ۇلى تۇسىندا قازاقستاندىق سپورتشىلار سپورتتىڭ ءار تۇرىنەن كوپتەگەن ءىرى حالىقارىلىق جارىستاردا بايگەلى بولىپ، قازاقستانننىڭ اتىن الەمگە تانىمال ەتتى.
بۇگىندە الماتىداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى كەڭپەيىلدى كەمەل باسشى، بىلگىر مامان، ارداقتى تۇلعا، قوعام قايراتكەرى كاركەن احمەت ۇلى احمەتوۆتىڭ اتىمەن اتالادى. بۇل مەكتەپتەن اتى الەمگە تانىلعان سپورتشىلاردىڭ قاتارى قالىڭ. سولادىڭ ءبىرى ءارى بىرەگەيى - وليمپيادا ويىندارىنىڭ كۇمىس جۇلدەگەرى ەلدوس سمەتوۆتى ايتسا، جەتىپ جاتىر. ايتۋلى مەكتەپ-ينتەرنات كوللەدجدىڭ قابىرعاسىندا ايگىلى تۇلعانى ەسكە الۋعا ارنالىپ ۇيىمداستىرىلعان دودالى جارىستىڭ ماقساتى دا سول جاس ۇرپاققا التىننىڭ سىنىعى كاركەن احمەتوۆتىڭ كىم بولعانىن ەسكە الا وتىرىپ، جاس بۋىننىڭ سپورتقا ەلگە دەگەن كوزقاراسىن جاقسارتا ءتۇسۋ بولعان ەكەن.
جۋىردا دزيۋدو اكادەمياسىندا مەملەكەت جانە قوعام قايراتكەرى، قازاق سپورتىنىڭ جاناشىرى كاركەن احمەتوۆتى ەسكە الۋعا ارنالعان كادەتتەر اراسىندا رەسپۋبليكالىق تۋرنير بولىپ ءوتتى. بۇل جارىستى وتكىزۋگە ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى مۇرىندىق بولدى. تۋرنيرگە قۇرمەتتى قوناق رەتىندە كاركەن احمەتوۆتىڭ تۇعان ۇلى نۇرلان كاركەن ۇلى جانە دزيۋدو كۇرەسىنەن كوپتەگەن سپورت ساڭلاقتارىن باپتاعان ق ر ەڭبەك سىڭىرگەن جاتتىقتىرۋشىلارى – جەكسەنباي سالاماتوۆ، سەيدوللا كالييەۆ، دۇيسەن ايازبەكوۆ جانە تولەگەن سۇلتانوۆتار كەلىپ قاتىستى.
جارىسقا «شاڭىراق» شاعىناۋدانىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى مەن وننان استام سپورت كلۋبىنان كەلگەن 100-دەن اسا تاتامي شەبەرلەرى 9 سالماق دارەجەسى بويىنشا ءوزارا مىقتىنى انىقتادى. كاركەن احمەتوۆ اتىنداعى سپورت مەكتەبىنىڭ جاس سپورتشىلارى بۇل جارىستا جوعارى ناتيجە كورسەتتى. سىن الاڭىندا ونەر كورسەتكەن 6 سالماقتا الاڭ يەلەرى 6 التىن، 1 كۇمىس 3 قولا مەدالدى جەڭىپ الدى .
سونىمەن التىن القالاردى عابيت راسۋلحان (46 كگ)، نۇراسىل پان (50 كگ) الدى.
I ورىندى التىنبەك كونىسباي (55 كگ)، مۇحامەتالى جىلقايدىر (60 كگ)، دياس يحسانوۆ (66 كگ)، باتىرحان توقتارلار (+73) جەڭىپ السا، جالعىز كۇمىستى 55 كگ سالماقتا ايدىن شۇكىربەك يەلەندى. ال جۇلدەلى قولا مەدالدار مارحانبەت جانارىس (42 كگ)، قۇربان ورازاقىنوۆ (60 كگ)، نۇردوس دوسبەرگەننىڭ (60 كگ) ەنشىسىنە ءتيدى.
جارىس سوڭىندا ءقادىرلى قوناقتارعا ەستەلىك سىيلىقتار تابىستالىپ، جەڭىمپازدار مەن جۇلدەگەرلەر ماراپاتتالدى. وسىنداي جارىستار دارىندى بالۋانداردىڭ شىڭدالىپ وسۋىنە زور ىقپال بەرەرى ءسوزسىز. الداعى ۋاقىتتا بۇل تۋرنير حالىقارالىق دەڭگەيگە كوتەرىلىپ جاتسا، نۇر ۇستىنە نۇر بولار ەدى.