تۇركيادا قۇربان ايت مەرەكەسىنىڭ العاشقى كۇنىندە قۇرباندىق شالۋ بارىسىندا 14 372 ادام جاراقات الىپ، مەديسينالىق كومەككە جۇگىنگەن، دەپ حابارلايدى aqshamnews.kz ءتىلشىسى.
بۇل مالىمەتتى ەلدىڭ دەنساۋلىق ساقتاۋ ءمينيسترى كەمال مەميشوعلۋ X الەۋمەتتىك جەلىسىندەگى پاراقشاسىندا جاريالادى. ونىڭ ايتۋىنشا، جاراقات العانداردىڭ قاتارىندا انكارادان – 1049، ستامبۋلدان – 753، كونيادان – 655، گازيانتەپتەن – 634 تۇرعىن تىركەلگەن.
مۇسىلمان قاۋىمى بۇل كۇنى قۇرباندىق شالىپ، ەتىن مۇقتاج جاندارعا تاراتادى. الايدا تۇركيادا جىل سايىن وسى ءدىني ءراسىم كەزىندە جاراقات الۋ دەرەكتەرى ءجيى كەزدەسەدى.
مينيستر مەميشوعلۋ تۇرعىندارعا قاۋىپسىزدىك شارالارىن قاتاڭ ساقتاۋعا، سونداي-اق قۇرباندىقتى ارنايى دايىندىقتان وتكەن ماماندارعا عانا شالدىرۋعا كەڭەس بەردى.
ايتا كەتەيىك، 2024 جىلى دا قۇربان ايتتىڭ ءبىرىنشى كۇنىندە تۇركيادا 16 مىڭعا جۋىق ادام دارىگەرلەر كومەگىنە جۇگىنگەن بولاتىن.