قوستاناي قالاسىندا بەلگىسىز ءبىر جىگىتتى اسكەري كوميسسارياتقا كۇشتەپ الىپ كەتپەك بولعان وقيعاعا قاتىستى پوليسيا تەكسەرىس باستاعانىن مالىمدەدى، دەپ حابارلايدى aqshamnews.kz ءتىلشىسى.
كۋاگەرلەردىڭ سوزىنشە، وقيعا 6 ماۋسىمدا كەشكى ساعات 22:00 شاماسىندا بولعان. جۇمىسىنان شىعىپ كەلە جاتقان جىگىتكە ازاماتتىق كيىم كيگەن ءۇش ەر ادام جاقىنداعان.
"ولار وزدەرىن تانىستىرعان جوق. جىگىتتى كۇشتەپ الىپ كەتپەك بولدى. ءبىزدىڭ قىزمەتكەرلەردى يتەرىپ، بالاعاتتادى. زاڭگەرىمىزدى كۇتپەستەن، ونى كۇشتەپ كولىككە وتىرعىزىپ اكەتتى"، – دەيدى كۋاگەرلەردىڭ ءبىرى.
وسى جاعدايعا بايلانىستى قوستاناي وبلىسى پوليسيا دەپارتامەنتى تۇسىنىك بەردى.
"قىزمەتتىك تەكسەرىس باستالدى. ونىڭ ناتيجەسىندە پوليسەيلەردىڭ ارەكەتىنە قۇقىقتىق باعا بەرىلەدى"، – دەلىنگەن ۆەدومستۆونىڭ رەسمي حابارلاماسىندا.