وڭتۇستىك كورەيانىڭ چەچحون قالاسىندا وتكەن سپورتتىق گيمناستيكادان ازيا چەمپيوناتىندا ناريمان قۇربانوۆ قازاقستان قۇراماسىنا العاشقى التىن مەدالدى سىيلادى، دەپ حابارلايدى aqshamnews.kz ءتىلشىسى.
7 ماۋسىمدا قۇربانوۆ ات سناريادىنداعى فينالدىق باسەكەدە ونەر كورسەتىپ، 14،933 ۇپاي جيناپ، ءبىرىنشى ورىنعا يە بولدى. كۇمىس جۇلدەنى وڭتۇستىك كورەيالىق حۋر ۆۋن (14،633 ۇپاي)، ال قولا جۇلدەنى ۆەتنام سپورتشىسى دانگ نگوك سۋان تەن (14،233 ۇپاي) ەنشىلەدى. سونداي-اق ۇزدىك بەستىككە قازاقستاندىق ءىلياس ازيزوۆ تە (13،933 ۇپاي) ەندى.
وسى جەڭىسىمەن قۇربانوۆ ءۇش دۇركىن ازيا چەمپيونى اتاندى. بۇعان دەيىن ول 2022 جىلى ات سناريادىنان كۇمىس، ال 2023 جانە 2025 جىلدارى كوماندالىق كوپسايىستا ەكى قولا مەدال جەڭىپ العان بولاتىن.
قازىرگى تاڭدا قازاقستاننىڭ ەرلەر قۇراماسىنىڭ قورجىنىندا ازيا چەمپيوناتىنان ءۇش جۇلدە بار. قۇربانوۆتىڭ التىن جانە قولا مەدالدەرىنەن بولەك، ميلاد كاريمي ەدەندەگى جاتتىعۋدان كۇمىس مەدال ەنشىلەگەن.
ايتا كەتەيىك، چەمپيونات 8 ماۋسىم، جەكسەنبى كۇنى مارەسىنە جەتەدى. سوڭعى جارىس كۇنىندە ميلاد كاريمي تۋرنيك جاتتىعۋىنان جۇلدە ءۇشىن سىنعا تۇسەدى.
ەسكە سالايىق، 2024 جىلى پاريج وليمپياداسىندا ناريمان قۇربانوۆ كۇمىس مەدال جەڭىپ العان بولاتىن. بۇل – قازاقستان تاريحىنداعى سپورتتىق گيمناستيكادان العاشقى وليمپيادا جۇلدەسى.