قازاقستان ازاماتىنا ىستانبۇلدا بولعان قاقتىعىس كەزىندە وق ءتيدى.
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى Almaty-akshamy.kz Elorda.info-عا سىلتەمە جاساپ.
«18 ساۋىردە ىستانبۇلداعى ق ر باس كونسۋلدىعىنا ءبىزدىڭ ازاماتتان قوڭىراۋ كەلىپ ءتۇستى، ول وزىنە وق تيگەنىن حابارلادى. كونسۋل دەرەۋ زارداپ شەككەن ازاماتقا بارىپ، ونى جەرگىلىكتى اۋرۋحاناعا جەتكىزدى. مەديسينالىق تەكسەرۋدەن ءوتتى، وتا جاسالادى دەپ كۇتىلۋدە. ءقازىر جەرلەسىمىزدىڭ جاعدايى تۇراقتى»، - دەدى ايبەك سمادياروۆ.
مالىمەتكە سايكەس، جەرلەسىمىز جاراقات العان كەزدە قاسىندا ايەلى بولعان.
«الدىن الا مالىمەتتەر بويىنشا، وتانداسىمىز جەرگىلىكتى ازاماتتار اراسىنداعى اتىسقا كەزدەيسوق تاپ بولعان. ول وزدىگىنەن كەتىپ بارا جاتقاندا وق تيگەن. بۇگىندە پوليسيا وقيعانىڭ ءمان-جايىن انىقتاۋ ءۇشىن تەرگەۋ جۇرگىزىپ جاتىر»، - دەيدى ۆەدومستۆودان.