قالاشىقتا قۇرىلىس قارقىندى جۇرەدى
مەملەكەت باسشىسىنىڭ تاپسىرماسى اياسىندا قازاق ءبىلىمىنىڭ قاراشاڭىراعى ءال- فارابي اتىنداعى ۇلتتىق ۋنيۆەرسيتەتتە قۇرىلىستىڭ ەكىنشى كەزەڭى باستالىپ، جاڭادان سالىناتىن جاتاقحانانىڭ العاشقى قاداسى قاعىلدى. وسىناۋ سالتاناتتى شاراعا عىلىم جانە جوعارى ءبىلىم ءمينيسترى ساياسات نۇربەك، ۇلتتىق عىلىم اكادەمياسىنىڭ پرەزيدەنتى كۇنسۇلۋ زاكاريا، «اتامەكەن» ۇلتتىق كاسىپكەرلەر پالاتاسى باسقارما ءتوراعاسىنىڭ ءبىرىنشى ورىنباسارى ماقسات قيقىموۆ، الماتى قالاسى اكىمىنىڭ ورىنباسارى الىشەر ءابدىقادىروۆ، الماتى قالاسى كاسىپكەرلەر پالاتاسىنىڭ ءتوراعاسى اۋەز تايىمبەتوۆ قاتىستى.
العاشقى ءسوز كەزەگىن العان وقۋ ورداسىنىڭ باسشىسى جانسەيىت قانسەيىت ۇلى وقۋ ورداسىنىڭ ەكىنشى تىنىسى اشىلىپ، قارقىندى قۇرىلىس باستالاتىنىن جەتكىزدى.
– بارشامىز تاريحي ساتكە كۋا بولىپ وتىرمىز. مەملەكەت باسشىسىنىڭ تىكەلەي قولداۋىنىڭ ارقاسىندا قالاشىق ىشىنەن 12 مىڭ ستۋدەنتتى قامتيتىن جاڭا جاتاقحانالار بوي كوتەرەتىن بولدى. بۇگىن ەڭ العاشقى جاتاقحانانىڭ كىرپىشى قالانىپ جاتىر. باس جوسپارعا سايكەس، جاڭادان بوي كوتەرەتىن عيماراتتار قاتارىندا 12 جاتاقحانا، 9 وقۋ كورپۋسى، 5 اكىمشىلىك عيمارات سالىنادى. العاشقى قۇرىلىستىڭ ىرگەتاسى قالانىپ، كاپسۋلاعا ءمينيستردىڭ قولى قويىلعان ارنايى حاتتى سالامىز. تاۋ ەتەگىنە تۇرەن سالىپ، قالاشىقتا قۇرىلىس باستالادى، – دەدى رەكتور.
وسىناۋ الىپ قۇرىلىسقا قولداۋ ءبىلدىرىپ جاتقان شاھار باسشىسىنا العىسىن ءبىلدىرىپ، قالا اكىمىنىڭ ورىنباسارى الىشەر ءابدىقادىروۆقا ءسوز كەزەگىن ۇسىندى. ءوز كەزەگىندە قالا باسشىسىنىڭ ورىنباسارى ەلىمىزدىڭ ماقتانىشى بولعان وقۋ ورداسىنا قاشاندا قولداۋ ءبىلدىرىپ، كومەك كورسەتۋگە دايىن ەكەندىكتەرىن جەتكىزدى.
سالتاناتتى شارانىڭ قوناعى، استانادان ارنايى كەلگەن عىلىم جانە جوعارى ءبىلىم ءمينيسترى ساياسات نۇربەك ەلىمىزدە ەڭ العاشقى اكادەميالىق قالاشىق بولىپ اشىلعان وقۋ ورداسىنا 1974-1975 جىلدان بەرى قوماقتى قارجىنىڭ بولىنبەگەنىن، اراعا ۇزاق جىلدار سالىپ مەملەكەت باسشىسى قاسىم-جومارت توقايەۆتىڭ قولداۋىنىڭ ارقاسىندا ۋنيۆەرسيتەتتىڭ ەكىنشى تىنىسى اشىلىپ جاتقانىنا توقتالدى.
– ءبىز ءۇشىن وتە قۋانىشتى كۇن بولىپ وتىر. بۇل بىلىمگە، عىلىمعا كورسەتىلىپ جاتقان قولداۋ. سوندىقتان وقۋ ورداسىن جاڭا يننوۆاسيالىق دەڭگەيگە جەتكىزەيىك. بىلىكتى ماماندار دايارلاپ، ەلىمىزدىڭ دامۋىنا ۇلەس قوسايىق.
جالپى، الماتىداعى ەڭ وزەكتى ماسەلە جاتاقحانا تاپشىلىعى ەكەنىن بىلەسىزدەر. ماسەلەن، 180 مىڭنان استام ستۋدەنتتىڭ كەم دەگەندە 30 مىڭى جاتاقحاناعا مۇقتاج. ءبىز مەملەكەت باسشىسىنىڭ تاپسىرماسىنا سايكەس «الماتى قالاسىنىڭ دامۋ باعدارلاماسى» نەگىزىندە مينيسترلىكپەن بىرلەسىپ، جاتاقحانا ماسەلەسىن 4-5 جىلدىڭ ىشىندە شەشۋدى قولعا العان ەدىك. ارينە، ەڭ الدىمەن قالا اۋماعىنداعى جەردىڭ تاپشىلىعى كەدەرگى بولعانىمەن، جاتاقحانا قۇرىلىسىن سالۋعا نيەتتى ينۆەستورلار وتە كوپ، – دەدى مينيستر.
سونىمەن قاتار، عىلىم جانە جوعارى ءبىلىم ءمينيسترى قونايەۆتا اكادەميالىق قالاشىق سالۋ جۇمىستارىنىڭ باستالعانى مەن «2023–2029 جىلدارعا ارنالعان جوعارى ءبىلىم مەن عىلىمدى دامىتۋ تۇجىرىمداماسىنىڭ» جوباسى تۋرالى كەڭىنەن باياندادى. جوبا بارىسىندا ستۋدەنتتەر جاتاقحاناسىنىڭ سانى ارتىپ، 7 جىلدا جاڭادان 10 مىڭ ورىن اشۋدى جوسپارلاپ وتىرعانىن جەتكىزدى.