ەلىمىزدىڭ ۇلكەن قالالارىندا تۇرىك اسحانالارىن دا ءجيى كەزدەستىرەمىز. دەگەنمەن تۇركيادا دا قازاقتىڭ ۇلتتىق تاعامدارىنا سۇرانىس جوعارى ەكەن. بۇعان سوڭعى ۋاقىتتا ىستامبۇلدا بىرنەشە قازاق مەيرامحاناسىنىڭ اشىلۋى دالەل، دەپ حابارلايدى Almaty-akshamy.kz.
شۆەيساريالىق كاسىپكەر حارۋن تۇركيادا تۇراتىن تۋىستارىنا ءجيى كەلىپ تۇرادى. كەلگەن سايىن قازاق تاعامدارىن ىزدەپ ءجۇرىپ جەيدى ەكەن. سەبەبى قازاقى مازىرمەن ۇسىنىلعان مۇنداي كەڭ داستارحان باسقا جەردە جوق دەيدى.
«مەن شۆەيساريادا تۇرام. الەمنىڭ كوپتەگەن ەلدەرىن ارالادىم. ءبىر رەت الماتىدا بولدىم. سول كەزدە قازاق تاعامدارىنىڭ ءدامىن العاش رەت تاتتىم. سودان بەرى قاي جەردە قازاق مەيرامحاناسى بولسا ارنايى بارام. سەبەبى سىزدەردىڭ قۋىرداق پەن باۋىرساققا جەتەتىن تاعام جوق»، - دەيدى شۆەيساريا ازاماتى حارۋن.
ىستامبۇلدا سوڭعى ءبىر جىلدا ءۇش بىردەي قازاق مەيرامحاناسى اشىلدى. شەتەلدىكتەرمەن قاتار بۇل ورىندارعا ەلدىڭ ءدامىن اڭساعان قازاقستاندىقتار دا ءجيى كەلەدى.
«وسىمەن ەكىنشى رەت كەلىپ تۇرمىن. تاعامدارى ەرەكشە. اسىرەسە، قىمىزدىڭ قىشقىل ءدامىن ۇناتتىم. سوسىن مەيرامحانانىڭ ىشكى بەزەندىرۋى قاتتى ۇنادى. ويۋ-ورنەك، ادەمى كورپەلەر. قۇددى ءبىر مۇراجايدا وتىرعانداي بولاسىڭ»، - دەيدى ىستامبۇل قالاسىنىڭ تۇرعىنى مينۋر تاس.
الەمگە تانىمال تۇرىك تاعامدارىمەن باسەكەلەسۋ وڭاي ەمەس. دەگەنمەن تابيعي ءارى ءنارلى ۇلتتىق داستارحانىمىزدى كەز كەلگەن ەلدە ۇيالماي ۇسىنا الاسىڭ دەيدى وسى كاسىپتى دوڭگەلەتىپ وتىرعان دانيار.
«ءوزىمىزدىڭ ۇلتتىق تاعامدارىمىزدى، ۇلتتىق ءداستۇرىمىزدى وسى ىستامبۇلدا كورسەتكەننەن كەيىن، بۇل جاقتا وزگە ۇلت وكىلدەرى وتە كوپ. ىستامبۇلعا دەمالىسقا كەلىپ جاتقاندار وتە كوپ. تەك قازاقتارمەن شەكتەلىپ قالماي وزگە ۇلتتارعا دا ءبىز قوناق قىلىپ كۇتىپ جاتقان جايىمىز بار. ءبىزدىڭ تاعامدار تويىمدى عوي. اسىرەسە، ەر ازاماتتارعا ءبىز دەليكاتەس دەپ ايتىپ قويامىز كۇلىپ. باسقا ۇلتتار كەلىپ ريزاشىلىعىن ءبىلدىرىپ كەتەدى»، - دەيدى كاسىپكەر دانيار يمانباقوۆ.
الەمدە يتاليا، تۇركيا مەن جۇڭگو اسحانالارى ەڭ تانىمال دەيدى ماماندار. دەگەنمەن، اسپەتتەي بىلسە، ۇلتتىق تاعامدارىمىزدى دا دۇنيەجۇزىلىك دەڭگەيگە كوتەرۋگە بولادى. ءار قالتارىسىندا ءبىر ءدامحانا بار ىستامبۇلدا قازاق تاعامدارىنا سۇرانىستىڭ جوعارى بولۋى وسىنى مەڭزەيدى.