تۇركيادا مۇستافا شوقايدىڭ ەڭبەكتەرى توپتاستىرىلعان كىتاپتاردىڭ تانىستىرلىمى ءوتتى

«كەڭەس وداعىنىڭ تۇركى الەمى ساياساتى» اتتى جيناق قازاق، تۇرىك، ورىس جانە فرانسۋز تىلدەرىندە باسىلدى.

مازمۇندى ەڭبەكتى جيناقتاعان بەلگىلى شوقايتانۋشى عالىم، ميمار سينان ۋنيۆەرسيتەتىنىڭ پروفەسسورى ءابدىۋاقاپ قارا. بۇل توپتاماعا مۇستافا شوقايدىڭ ءبىر عاسىر بۇرىن جارىق كورگەن 120 ماقالاسىنىڭ ەڭ وزەكتى 41ء-ى تاڭدالعان، دەپ حابارلايدى Almaty-akshamy.kz.

اۆتوردىڭ ايتۋىنشا مۇستافا شوقاي وتاننان جىراق، قۋعىندا جۇرگەن كەزدەگى ەڭبەكتەرى ەۋروپا باسپالارىندا ءجيى جاريالانعان. سول كەزەڭدە بۇكىل الەم ازاتتىق پەن ەركىندىكتى اڭساعان تۇركى جۇرتى تۋرالى ونىڭ ماقالالارىنان تانىپ ءبىلدى. تۇركيالىق عالىمدار مۇستافا شوقايدى تەك قازاق ەمەس كۇللى تۇركى حالىقتارىنىڭ تاۋەلسىزدىگى ءۇشىن كۇرەسكەن ەرەكشە قايراتكەر دەپ تانيدى.

«مۇستافا شوقايدىڭ ءوزى سويلەپ تۇر. ياعني، مۇنى وقىرمان ونىڭ پىكىرىنەن، ونىڭ قالامىنان تۋىنداعان ەڭبەكتەرىن وقىپ، ءوز قورىتىندىسىن شىعارىپ، ءوز باعاسىن ءوزى بەرەدى. بىرەۋدىڭ ايتقان باعاسىمەن ەمەس، ءوزىنىڭ كوزىمەن وقىعان مۇستافا شوقايدىڭ قالامىنان شىققان تۋىندىدان ناقتى باعاسىن بەرەدى. ءبىز مۇستافا شوقايدى بۇعان دەيىن ۇلى مەملەكەت قايراتكەرى دەپ بىلدىك. الاشتىڭ ارداگەرلەرىنىڭ ءبىرى دەپ. مىنا كىتاپتا وقىعاندا مۇستافا شوقاي سونىمەن قاتار، ەكونوميكانى كۇشتى بىلگەن، حالىقارالىق ساياساتتى كۇشتى بىلگەنى، تاريحتى جاقسى بىلگەن، فيلوسوفيانى جاقسى بىلگەن ونى قالامىنان كورىپ وتىرمىز»، - دەيدى ميمار سينان ۋنيۆەرسيتەتىنىڭ پرفەسسورى ءابدىۋاقاپ قارا.