بەرلين تۇرعىندارى BERLIN BAZAAR-2023 كورمەسىندە قازاق مادەنيەتى مەن قولونەرىنە ءتانتى بولدى
وتاندىق وندىرۋشىلەر 8-12 قاراشا كۇندەرى گەرمانيادا وتكەن الەمدەگى ەڭ ءىرى Berlin Bazaar حالىقارالىق كورمەسىنە قاتىستى. قازاقستاننىڭ ۇلتتىق پاۆيلونى تۋريزم جانە سپورت مينيسترلىگىنىڭ تاپسىرىسى بويىنشا «Kazakh Tourism» ۇك اق قولداۋىمەن ەل ءتۋريزمىن ونەر جانە قولونەر ارقىلى تانىتۋ اياسىندا ۇيىمداستىرىلدى، دەپ حابارلايدى اlmaty-akshamy.kz.
جىل سايىنعى Berlin Bazaar كورمەسىنە بيىل الەمنىڭ 60 ەلىنەن تىركەلگەن 500-گە جۋىق كرەاتيۆتى كاسىپكەرلەر ءوز ونىمدەرىن ۇسىندى. ۇيىمداستىرۋشىلاردىڭ ايتۋىنشا، اتالعان كورمە وتاندىق ۇلتتىق برەندتەر ءۇشىن جاڭا ەكسپورتتىق نارىقتاردى اشۋعا، قازاق حالقىنىڭ مادەنيەتى مەن تۇرمىسىن تانىستىرۋعا جانە ەلىمىزگە ساياحاتتاعىسى كەلەتىن الەۋەتتى تۋريستەرمەن كوممۋنيكاسيا ورناتۋعا ءتيىمدى پلاتفورما بولدى. كورمەدە قازاقستان پاۆيلونىن كەلۋشىلەرگە ءبىرقاتار قولونەر شەبەرى، تابيعي ونىمدەردى جانە «fair trade» تاۋارلارىن وندىرۋشىلەر مەن ديزاينەرلەر تانىستىردى. ال «Kazakh Tourism» وكىلدەرى پاۆيلون قوناقتارىنا ەلىمىزدىڭ ەڭ كورىكتى جەرلەرى، كۋرورتتىق ايماقتار مەن بىرەگەي تابيعي لاندشافتتارىمىز تۋرالى ايتىپ بەردى. ول ءۇشىن ۇلتتىق پاۆيلوندا ورنالاسقان ۇلكەن ەكرانداردا قازاقستان ءتۋريزمى تۋرالى بەينەروليكتەر كورسەتىلدى. مالىمەت ءۇشىن ايتا كەتەيىك، جۋىردا قازاقستان ءتۋريزمى تۋرالى تۇسىرىلگەن ۆيدەوروليك ەۋروپادا ەكى اتالىم بويىنشا ۇزدىك دەپ تانىلعان-دى.
«قازاقستان – اسەم تابيعاتقا عانا ەمەس، مادەني مۇراعا دا باي مەملەكەت. بەرليندەگى كورمەگە ەلىمىزدىڭ تۇكپىر-تۇكپىرىنەن ىرىكتەلگەن ەڭ ۇزدىك قولونەر شەبەرلەرى جاساعان ونىمدەر قويىلدى. ءبىزدىڭ ديزاينەرلەر مەن شەبەرلەردىڭ ونىمدەرى ەلىمىزدىڭ ۇلتتىق مادەني كودىمەن جانە وزىندىك ەرەكشەلىگىمەن دارالانىپ تۇردى. مۇنداي ءىس-شارالار قازاقستاننان تىس جەرلەردە ەل ءتۋريزمىن دارىپتەۋگە تاماشا مۇمكىندىك بەرەدى. ءبىز الەمنىڭ ءار قيىرىنان كەلەتىن قوناقتاردى قارسى الۋعا جانە ولاردى تاڭ قالدىرۋعا ءارقاشان دايىنبىز»، - دەدى تۋريزم جانە سپورت ۆيسە-مينيسترى ەرجان ەركىنبايەۆ.
قازاقستان پاۆيلونى كورمە زالىنىڭ ورتاسىندا كيىز ءۇي شەڭبەرىندە جاسالىپ، كەلگەن قوناقتار ەلىمىزدىڭ ادەت-عۇرپى، سالت-داستۇرىمەن تانىستى. كورمەدەگى قازاقستان ستەندىنىڭ ءبىر ەرەكشەلىگى، اسسول بۇركەنشىك ەسىمىمەن تانىمال وتاندىق سۋرەتشىنىڭ بىرەگەي تۋىندىلارى قويىلدى. قىلقالام يەسى ەرەكشە تۋىندىلارىن جاساۋدا كەنەپ ماتانىڭ ورنىنا كىلەمدەردى قولدانعان. سونداي-اق بۇل تۋىندىلاردىڭ باسىم بولىگى قازاقستاننىڭ اڭىز ايەلدەرىنە ارنالعان. اتاپ ايتقاندا، ونىڭ سۋرەتتەرىندە ساق پاتشايىمى ءتوميريستىڭ، ميفتىك جەر انا جانە باسقا دا تاريحي تۇلعالار بەينەلەنگەن.
«قازاقستان – تاڭعاجايىپ ەل. وسى كورمەدەگى ەڭ ۇلكەن پاۆيلون سىزدەردىكى بولدى. ماعان قىسقى ۇلتتىق كيىمدەر، مويىنوراعىشتار مەن ۇلتتىق ويۋ-ورنەكتەرى بار بەتپەردەلەر وتە قاتتى ۇنادى. بۇل – ەۋروپالىقتار ءۇشىن تاڭسىق نارسە. قازاقستاندىق توپتاما ەرەكشە ەكەن، ونى كوپتەگەن ءسان كورسەتىلىمىندە تانىستىرۋعا بولادى»،- دەپ اسەرىمەن ءبولىستى بەرلين تۇرعىنى گيۋل شيندلەر.
سونىمەن قاتار پاۆيلوندا قازاقستاندىق شەبەرلەردىڭ اعاشتان، بىلعارىدان جاسالعان زەرگەرلىك بۇيىمدارى، توقىما ونىمدەرى قويىلدى. قازاقستاننىڭ ۇلتتىق پاۆيلونى جارمەڭكە قوناقتارى اراسىندا ەرەكشە قىزىعۋشىلىق تۋدىردى. جارمەڭكە بارىسىندا وتاندىق ديزاينەرلەردىڭ ونىمدەرى كورسەتىلىپ، كەلگەن قوناقتارعا ۇلتتىق ءتاتتى تاعامدار ۇسىنىلدى.