جەر سىلكىنىسى ايماعىندا 50 مىڭنان استام شاتىرلار قۇرىلعان
سوڭعى اقپارات بويىنشا، تۇركياداعى جەر سىلكىنىسىنەن 9557 ادام قازا تاپتى. تاعى 40 مىڭعا جۋىعى جاراقات العان. قورشاعان ورتا، ۋربانيزاسيا جانە كليماتتىڭ وزگەرۋى، ءمينيستردىڭ مالىمدەۋىنشە، اپات مىڭ شاقىرىمعا جۋىق اۋماققا اسەر ەتكەن. ول جەردە شامامەن 13 جارىم ميلليون ادام ءومىر سۇرەدى، دەپ حابارلايدى Almaty-akshamy.kz حابار-24 تەلەارناسىنا سىلتەمە جاساپ.
تۇركيادا 7 باللدان جوعارى قوس جەر سىلكىنىسىنەن كەيىن تۇرعىندار ايماقتا 11 302 عيماراتتىڭ قيراعانىن حابارلادى. 5 775 نىساننىڭ بۇزىلعانى رەسمي تىركەلدى. وسى ۋاقىتقا دەيىن قۋاتتىلىعى ءارتۇرلى 684 سەيسميكالىق تولقۋ بولدى. قايتالانىپ جاتسا، تۇرعىنداردىڭ قاۋىپسىزدىگىن ساقتاۋ ءۇشىن جەرگىلىكتى اكىمشىلىك- حالىققا اپاتتى عيماراتتارعا جاقىنداماۋىن ەسكەرتتى.
- 55 ساعاتىمىزدى اياقتادىق. 7،7 باللدان كەيىن ءبىز 7،6 باللدىق ەكىنشى جەر سىلكىنىسىن باستان وتكەردىك. كۇرەس ەڭ سەزىمتال جانە قارقىندى تۇردە جالعاسۋدا. يزميردەگى جەر سىلكىنىسىنىڭ 110-ساعاتىندا ءۇيىندى استىنان سابيلەرىمىز بەن بالعىندارىمىزدى الىپ شىقتىق. مۇندا دا ىزدەستىرۋ-قۇتقارۋ جۇمىستارىن وسى موتيۆاسيامەن تاباندى تۇردە جۇرگىزىپ جاتىرمىز، - دەيدى تۇركيانىڭ قورشاعان ورتا، ۋربانيزاسيا جانە كليماتتىڭ وزگەرۋى ءمينيسترى مۇرات كۋرۋم.
وكىنىشكە قاراي، حاتاي پروۆينسياسىندا ەكى قانداسىمىز ءۇيىندى استىندا قالىپ قويعان. ولار مۇستافا وزتۇرىكتىڭ تۋىستارى ەكەنى بەلگىلى بولدى. ەسىمدەرى نۇراي جانە بۋشرا قازاق. تاپ ءقازىر قاراكوزدەرىمىزگە كومەكتەسۋ ءۇشىن ىستامبۇلدان ءبىر توپ ەرىكتىلەر شىققان.
- ءقازىر انتاكياعا (حاتايعا) كىردىك. جۇك كولىگىنىڭ ىشىندەمىز. جىعىلعان ءۇيىمىز بار. ءۇيىندىنىڭ ىشىندە قازاق اپكەمىز بەن قارىنداسىمىز بار. سولارعا كومەكتەسۋ ءۇشىن بارا جاتىرمىز. جولدار وتە قيىن. ماشينالار جۇرمەيدى. كومەك ءۇشىن فۋرامەن ءجۇرمىز. ىشىندە اتتار بار. سول كومەككە اپاراتىن. تەز ۋاقىتتا جەتۋىمىز كەرەك. اپكەمىز بەن قارىنداسىمىز ءۇش كۇننەن بەرى جىعىلعان ءۇيدىڭ استىندا. سوعان تەز كومەك سۇراپ وتىرمىز، - دەيدى ەركان شالىشكان.
توتەنشە جاعدايلار باسقارماسىنىڭ مالىمدەۋىنشە، جەر سىلكىنىسى ايماعىندا 50 مىڭنان استام شاتىرلار قۇرىلعان. وندا ءزىلزالادان زارداپ شەككەن تۇرعىندار ورنالاستىرىلماق. بۇدان بولەك ىستامبۇل بيرجاسىنىڭ ترانزاكسيالاردىڭ ۋاقىتشا توقتاتىلعانى بەلگىلى بولدى. ايتا كەتكەن ءجون، ددۇ ەۋروپالىق ايماقتىق بيۋروسى تۇركيا مەن سيرياداعى جەر سىلكىنىسىن 3-دەڭگەيدەگى توتەنشە جاعداي دەپ جاريالادى.