تۇركيا تۇڭعىش عارىشكەرىن ۇشىرادى

تۇركيا ءوز عارىشكەرىن حالىقارالىق عارىش ستانسياسىنا اتتاندىرادى.

رەسپۋبليكانىڭ 100 جىلدىق مەرەيتويىنا ارنالعان ايتۋلى شارا قاراشا ايىنا جوسپارلانعان، دەپ حابارلايدى Almaty-akshamy.kz 24.kz-كە سىلتەمە جاساپ. 

بۇل تۋرالى تۇركيا عارىش اگەنتتىگىنىڭ باسشىسى سەردار حۋسەين يىلدىرىم حابارلادى. ەل تاريحىنداعى تۇڭعىش تۇرىك عارىشكەرى 36 مىڭ ۇمىتكەردىڭ اراسىنان ىرىكتەلىپ الىندى. ءقازىر ءبىر ەر كىسى مەن ايەل تاڭدالدى. قوس كانديدات اقش، ەۋروپا مەن جاپونياداعى عارىش سالاسىنىڭ وزىق تەحنولوگيالارىمەن تانىسىپ، ارنايى ساباق الادى. 2021 جىلى تۇركيا پرەزيدەنتى عارىشكەرلەردى وقىتۋمەن قاتار ايعا ءوز زىمىراندارىن جىبەرۋدى قامتيتىن ۇلتتىق باعدارلاماسىن جاريالاعان ەدى. انكارا بۇل جوباعا شامامەن 6 ميلليارد دوللار جۇمساماق.

«الدىمىزداعى كەزەڭدە تۇرعىنداردىڭ جاپپاي 5G تەحنولوگياسىن پايدالانۋىن قامتاماسىز ەتەتىن ينفراقۇرىلىمدى قۇرىپ، 6G تەحنولوگياسىنا دايىندىقتى باستايمىز. الەمدەگى ەڭ ۇلكەن 10 سپۋتنيك وپەراتورىنىڭ بىرىنە اينالعان تۇركيانىڭ عارىشتاعى قۋاتىن ودان ءارى ارتتىرامىز. ەلىمىزدى ماڭىزدى تەحنولوگيالار نارىعىنا ەمەس، وندىرۋشىگە اينالدىراتىن ۇلتتىق تەحنولوگيالىق ۇستانىمىزدى جالعاستىرامىز»، - دەيدى تۇركيا پرەزيدەنتى رەدجەپ تاييپ ەردوعان.