شىعىستىڭ ۇلى اقىنى ءارى ويشىلى نيزامي گانجاۋيدىڭ شىعارماشىلىعى سونداي باي دا سان قىرلى، وعان قانشا رەت ۇڭىلسەڭ دە، قاي قىرىنان قاراساڭ دا، تولىق مەڭگەرۋ، تۇبەگەيلى ۇعىنۋ مۇمكىن ەمەس.
بۇل كەزدەيسوق ەمەس: نيزامي گانجاۋي بۇكىل الەمدە، سونىڭ ىشىندە تۇركى دۇنيەسىندە – تۇركيادا، قازاقستاندا، وزبەكستاندا جانە باسقا ەلدەردە سۇيىسپەنشىلىكپەن قابىلدانىپ، كەڭىنەن ناسيحاتتالىپ، قايتا-قايتا باسىلىپ شىعىپ كەلەدى.
كەشە باكۋدەگى تۇركى مادەنيەتى مەن مۇراسى قورىنىڭ ورتالىق شتاب-پاتەرىندە ۇيىم قىزمەتكەرى، اقىن، ازەربايجان جازۋشىلار وداعى جاستار كەڭەسىنىڭ ءتوراعاسى ءفاريد حۇسەيننىڭ ۇلى اقىن نيزامي گانجاۋيدىڭ «حامساسىنداعى» ءولىم ساتتەرىنە ارنالعان «اقيبەتناما» اتتى كىتابىنىڭ تۇساۋكەسەر ءراسىمى ءوتتى، - دەپ حابارلايدى Aqshamnews.kz.
«اقيبەتناما» – نيزامي گانجاۋيدىڭ «حامساسىنداعى» ءولىم تاقىرىپتارىنا قاتىستى ادەبي تۇسىندىرمەلەردەن قۇرالعان ەسسەلەر جيناعى.
ءىس-شاراعا TÜRKPA-نىڭ باس حاتشىسى مەحمەت سۇرەييا ەر، ازەربايجاندا اككرەديتتەلگەن تۇركى ەلدەرىنىڭ ديپلوماتيالىق كورپۋس وكىلدەرى، سونداي-اق مەملەكەت قايراتكەرلەرى، عالىمدار مەن ادەبيەت الەمىنىڭ وكىلدەرى، ب ا ق قىزمەتكەرلەرى قاتىستى.
شارادا ءسوز سويلەگەن تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا قور تۇركى حالىقتارىنىڭ باي مادەني مۇراسىن ساقتاۋ مەن ناسيحاتتاۋ باعىتىندا ماڭىزدى جوبالاردى جۇزەگە اسىرىپ جاتقانىن اتاپ ءوتتى.
«قوردىڭ باستاماسىمەن دايىندالعان باسىلىمدار مەن ءتۇرلى حالىقارالىق ءىس-شارالار تۇركى حالىقتارىنىڭ باي ادەبي جانە مادەني داستۇرلەرىن كەڭ اۋديتورياعا جەتكىزۋگە قىزمەت ەتەدى. بۇل باعىتتا ءفاريد حۇسەيننىڭ ەڭبەگى زور. ول قوردىڭ كوپتەگەن شارالارىنا قاتىسىپ، ازەربايجان، قازاقستان، قىرعىزستان، تۇركيا جانە باسقا ەلدەردە قوردى تابىستى تانىستىردى. ونىڭ رەداكتورلىعىمەن جارىق كورگەن باسىلىمدار ءتۇرلى كىتاپ كورمەلەرىندە قويىلدى»، – دەدى ا. رايىمقۇلوۆا.
شارانىڭ مودەراتورى، ازەربايجان جازۋشىلار وداعىنىڭ حالىقارالىق بايلانىستار جونىندەگى حاتشىسى، اقىن ءارى اۋدارماشى ءسالىم بابۋللاوعلى قوردىڭ باسىلىمدارى مەن شارانىڭ ماڭىزى جونىندە اقپارات بەردى. ول قوردىڭ باستاماسىمەن جارىق كورگەن باسىلىمدار تەك قانا كلاسسيكالىق جانە زاماناۋي ادەبيەتتىڭ تانىستىرىلىمى ەمەس، سونىمەن بىرگە تۇركىتىلدەس ەلدەر اراسىنداعى مادەني بايلانىستاردىڭ نىعايۋىنا دا قىزمەت ەتەتىنىن ايتتى.
ءسالىم بابۋللاوعلى نيزامي مۇراسىن وقىتۋ مەن ناسيحاتتاۋدا بۇل باسىلىمنىڭ قۇندى دەرەككوز رەتىندە ۇنەمى پايدالانىلاتىنىنا سەنىم ءبىلدىردى.
ازەربايجان اتاتۇرىك ورتالىعىنىڭ ديرەكتورى، اكادەميك نيزامي ءجافاروۆ ءفاريد حۇسەيننىڭ شىعارماشىلىعى تۋرالى ايتا وتىرىپ، اقىننىڭ ەڭبەكتەرىندە ۇلتتىق قۇندىلىقتاردىڭ ساقتالۋى مەن تۇركى دۇنيەسىنىڭ ورتاق مادەني مۇراسىنىڭ ناسيحاتتالۋى ايقىن كورىنەتىنىن اتاپ ءوتتى.
“اقيبەتناما” وقىرماندارعا ادام تاعدىرى، رۋحانيات پەن مادەنيەت تاقىرىپتارىن تەرەڭىنەن تانىستىرادى. شىعارماداعى اڭگىمەلەر مەن تالداۋلار ۇلتتىق قۇندىلىقتاردىڭ ساقتالۋىن، ادام بولمىسىنىڭ قىر-سىرىن جانە قوعام مەن جەكە تۇلعا اراسىنداعى قارىم-قاتىناستاردى كەڭىنەن بەينەلەيدى»، – دەدى اكادەميك.
كىتاپتىڭ رەداكتورى، فيلولوگيا عىلىمدارىنىڭ فيلوسوفيا دوكتورى، دوسەنت، نيزاميتانۋشى ءزاھرا اللاحۆەردييەۆا مەن فيلولوگيا عىلىمدارىنىڭ دوكتورى، پروفەسسور رۇستەم كامال قوردىڭ باستاماسىمەن جارىق كورگەن باسىلىمداردىڭ وقىرماندار اراسىندا ۇلكەن قىزىعۋشىلىق تۋدىرىپ، تۇركىتىلدەس حالىقتار اراسىنداعى مادەني ىنتىماقتاستىقتى نىعايتۋعا قىزمەت ەتەتىنىن اتاپ ءوتتى. ولار ءفاريد حۇسەيننىڭ ەڭبەكتەرىندە ۇلتتىق قۇندىلىقتاردى ساقتاۋ مەن ادام تاعدىرىن شەبەرلىكپەن بەينەلەۋىمەن قاتار، تۇركى دۇنيەسىنىڭ ورتاق مادەني مۇراسىن ناسيحاتتاۋىن جوعارى باعالادى.
نيزامي گانجاۋي اتىنداعى ازەربايجان ادەبيەتى ينستيتۋتىنىڭ ديرەكتورى، فيلولوگيا عىلىمدارىنىڭ فيلوسوفيا دوكتورى مەحمان حاسەنوۆ پەن اقىن قيسمەت باسىلىمنىڭ ادەبي-فيلوسوفيالىق ارتىقشىلىقتارىن اتاپ ءوتىپ، جاس اۆتوردىڭ شىعارماشىلىعىن جوعارى باعالادى.
ءىس-شارا بارىسىندا ءفاريد حۇسەيننىڭ ولەڭدەرى بەلگىلى كوركەمسوز شەبەرلەرى تۋرال احمەد، گۇنەل حاميدوۆا، سابيرا ابدۋللايەۆانىڭ ورىنداۋىندا وقىلدى، جاس اقىننىڭ ولەڭدەرىنە جازىلعان اندەر ەلگيز الييەۆ، ايشەن مەحدييەۆا، ياعۋت حاليلزادەنىڭ ورىنداۋىندا تىڭدالدى. انشىلەرگە تاردا ءساحاۆات ءماmmءادوۆ، قىلقوبىزدا توعرۋل قاسىموۆ، پيانينودا اگاراحيم سالاح سۇيەمەلدەدى.
شارا سوڭىندا ف. حۇسەين وقىرماندارعا كىتاپتارىنا قولتاڭبا بەرىپ، ەستەلىك سۋرەتكە ءتۇستى.
ءيا، ۇلى نيزامي گانجاۋي جۇزدەگەن، مىڭداعان كىتاپقا ارقاۋ بولدى، ءارى بولا بەرەدى. اقىننىڭ «حامساسىن» ءبىر رەت پاراقتاساڭ جەتكىلىكتى.