2025 جىلعى 14–16 مامىر كۇندەرى قازاقستاننىڭ تۇركىستان قالاسىندا « زامان مەن مادەنيەتتەر ديالوگىندا ياساۋي مۇراسى: گۋمانيستىك باعىت-باعدار مەن زاماناۋي سىن-قاتەرلەر» تاقىرىبىندا حالىقارالىق سيمپوزيۋم ءوتتى. اتالعان شاراعا تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا قاتىستى.
سيمپوزيۋمنىڭ اشىلۋىندا ءسوز سويلەگەن اقتوتى رايىمقۇلوۆا تۇركىستاننىڭ تۇركى الەمىنىڭ رۋحاني استاناسى رەتىندەگى ماڭىزىنا ەرەكشە توقتالىپ، ۇلى ويشىل قوجا احمەت ءياساۋيدىڭ ءىلىمى قازىرگى زاماندا دا ادامزات ءۇشىن ماڭىزدى مورالدىق باعدار بولىپ قالا بەرەتىنىن اتاپ ءوتتى. ول تۇركى مادەنيەتى جانە مۇراسى قورى جۇزەگە اسىرىپ جاتقان نەگىزگى باستامالارمەن تانىستىردى. ولاردىڭ قاتارىندا – تاريحي ەسكەرتكىشتەردى قالپىنا كەلتىرۋ جوبالارى، TurkicHeritage حالىقارالىق سيفرلىق پلاتفورماسى مەن كوپتىلدى كاتالوگتى ازىرلەۋ، تۇركى مەملەكەتتەرى مەن شەتەلدەردەگى جەتەكشى ۋنيۆەرسيتەتتەر جانىنان تۇركى مادەنيەتى ورتالىقتارىن اشۋ، سونداي-اق تۇركى ەپوستارى مەن ءداستۇرلى قولونەر ۇلگىلەرىن يۋنەسكو تىزىمىنە ۇسىنۋ سياقتى باستامالار بار.
ءوز سوزىندە قور باسشىسى قوجا احمەت ءياساۋيدىڭ «ديۋاني حيكمەت» شىعارماسىن ازەربايجان تىلىنە اۋدارۋ جۇمىسىنا دا ارنايى توقتالىپ ءوتتى. بۇل باستاما – ياساۋي مۇراسىن تۇركى حالىقتارى اراسىندا كەڭىنەن تاراتۋعا باعىتتالعان ماڭىزدى قادام رەتىندە باعالاندى.
سيمپوزيۋم ياساۋي مۇراسىن گۋمانيستىك كوزقاراس تۇرعىسىنان زەردەلەۋ ارقىلى زاماناۋي سىن-قاتەرلەردى تالقىلاۋعا ارنالعان ماڭىزدى عىلىمي-رۋحاني الاڭعا اينالدى.
ايتا كەتەيىك، سيمپوزيۋمنىڭ اشىلۋ سالتاناتىندا قۇتتىقتاۋ ءسوز سويلەگەندەر قاتارىندا قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين، ق ر مادەنيەت جانە اقپارات ءمينيسترى ايدا بالايەۆا، تۇركىستان وبلىسىنىڭ اكىمى نۇرالحان كوشەروۆ، ق ر عىلىم جانە جوعارى ءبىلىم ءمينيسترى (پلەنارلىق وتىرىستىڭ مودەراتورى) ساياسات نۇربەك، ينديانا ۋنيۆەرسيتەتىنىڭ پروفەسسورى (اقش) ديەۆين دە ۋيس جانە انكارا ۋنيۆەرسيتەتىنىڭ پروفەسسورى (تۇركيا) الي رافەت وزكان بولدى.
پلەنارلىق وتىرىس پەن سەكسيالىق سەسسيالار اياسىندا ازەربايجان، قازاقستان، قىرعىزستان، تۇركيا، وزبەكستان، تۇرىكمەنستان، تاجىكستان، يران، جاپونيا، گەرمانيا، ءۇندىستان، رەسەي، يتاليا، جۇڭگو جانە اقش-تىڭ جەتەكشى زەرتتەۋشىلەرى مەن ساراپشىلارى عىلىمي باياندامالار جاساپ، تاجىريبە الماستى.