الماتى قالاسىندا ەكى كۇنگە سوزىلعان "تۇركى الەمىنىڭ مەديا كەڭىستىگى: جاڭا داۋىردەگى مىندەتتەر مەن مۇمكىندىكتەر" اتتى VI حالىقارالىق تۇركىتىلدەس جۋرناليستەر مەديا فورۋمىنا ارنايى كەلگەن قىرعىز رەسپۋبليكاسى جۋرناليستەر وداعىنىڭ ءتوراعاسى يليازبەك بالتاشيەۆ ءوز سوزىندە تۇركى ەلدەرىنىڭ اقپاراتتىق ينتەگراسياسى ەڭ وزەكتى ماسەلەلەردىڭ ءبىرى ەكەنىن اتاپ ءوتتى. ونىڭ ايتۋىنشا، ءقازىر ونەر، مادەنيەت، كينو جانە باسقا سالالار بويىنشا بايلانىس جاقسى جولعا قويىلعانىمەن، مەديا سالاسىنداعى بىرلەسكەن جوبالار جەتكىلىكتى دەڭگەيدە دامىماعان.
"قازىرگى مەديا كەڭىستىك وتە جىلدام وزگەرىپ جاتىر. سيفرلىق تەحنولوگيالار، جاساندى ينتەللەكت، الگوريتمدەر مەن الەۋمەتتىك جەلىلەر قوعامنىڭ ويلاۋ جۇيەسىن قالىپتاستىرىپ، اقپارات قابىلداۋ مادەنيەتىنە تىكەلەي ىقپال ەتۋدە. وسىنداي كەزەڭدە ۇلتتىق اقپاراتتىق قاۋىپسىزدىكتى ساقتاۋ، مادەني كود پەن رۋحاني قۇندىلىقتاردى قورعاۋ اسا ماڭىزدى. ايتپەسە جاھاندىق اقپارات تولقىنىندا ءوزىمىزدى جوعالتىپ الۋ ءقاۋپى بار"، - دەدى قىرعىز ەلىنەن كەلگەن وكىل.
ول بۇقارالىق اقپارات قۇرالدارىنىڭ ميسسياسى تەك اقپارات تاراتۋ ەمەس ەكەنىن، ولاردىڭ يدەولوگيالىق تۇراقتىلىقتى، ۇلتتىق بىرەگەيلىك پەن رۋحاني تۇتاستىقتى ساقتاۋدا ۇلكەن ءرول اتقاراتىنىن باسا ايتتى. سپيكەردىڭ ايتۋىنشا، تۇركى حالىقتارىن بىرىكتىرەتىن ورتاق قۇندىلىقتار بار، ال سول قۇندىلىقتاردى زامان تالابىنا ساي ناسيحاتتاۋ – ورتاق مىندەت.
يليازبەك بالتاشيەۆ تۇركى مەملەكەتتەرىندە قۋاتتى مەديا پلاتفورمالار مەن اقپارات اگەنتتىكتەرى بولعانىمەن، ولار ءبىر-بىرىنىڭ ونىمدەرىن تولىق پايدالانا الماي وتىرعانىن سىنعا الدى. ونىڭ پىكىرىنشە، بۇل ورتاق ستاندارتتىڭ، ءبىرىڭعاي تەحنولوگيالىق جۇيەنىڭ جانە كەلىسىلگەن كونتەنت ساياساتىنىڭ جوقتىعىنان.
"ەگەر ءبىز تۇركى ەلدەرىنىڭ اقپاراتتىق كەڭىستىگىن بىرىكتىرەتىن ورتاق جاڭالىق اگرەگاتورىن جاساپ، ونى جاساندى ينتەللەكتكە نەگىزدەسەك، بۇل ستراتەگيالىق سەرپىلىس بولار ەدى. تۇركى مەملەكەتتەرىنىڭ اقپارات اگەنتتىكتەرىنەن جاڭالىقتاردى ءبىر جەرگە جيناپ، بىرنەشە مينۋت ىشىندە بۇكىل وڭىرگە تاراتا الاتىن سيفرلىق پلاتفورما قۇرىلسا، جۋرناليستيكا دا، اقپاراتتىق ساياسات تا جاڭاشا دەڭگەيگە كوتەرىلەدى"، - دەدى ول.
سپيكەر فورۋمنىڭ باستى ميسسيالارىنىڭ ءبىرى – وسى باعىتتاعى ماسەلەلەردى اشىق تالقىلاۋ ەكەنىن اتاپ ءوتتى. تۇركى الەمىنىڭ ورتاق اقپاراتتىق جۇيەسىن قۇرۋ، كونتەنت الماسۋدى كۇشەيتۋ، سيفرلىق جۋرناليستيكانى دامىتۋ الداعى جىلدارعا ارنالعان ماڭىزدى ستراتەگيالىق ماقساتتاردىڭ قاتارىندا تۇر.
فورۋم قاتىسۋشىلارىنىڭ ايتۋىنشا، مۇنداي باستامالار تۇركى ەلدەرىنىڭ اقپاراتتىق تاۋەلسىزدىگىن نىعايتىپ قانا قويماي، رۋحاني تامىردى، مادەني بىرەگەيلىكتى ساقتاۋعا ەرەكشە ۇلەس قوسادى. ءىس-شارا ەكى كۇن بويى جالعاسىپ، قاتىسۋشىلار تاجىريبە الماسىپ، ورتاق جوبالاردى جۇزەگە اسىرۋ ماسەلەلەرىن جان-جاقتى تالقىلاماق.