احمەت ءتۇزۇن ءوز بايانداماسىندا تۇركى دۇنيەسىنىڭ الەمدىك مادەنيەتكە قوسقان ۇلەسى وراسان ەكەنىن اتاپ ءوتتى. ونىڭ ايتۋىنشا، تۇركى حالىقتارىنىڭ ءداستۇرلى كيىمدەرى مەن قولونەرى سوزبەن ايتىپ جەتكىزگىسىز باي مۇرا.
"مىنا جەردە تۇرعان ۇلتتىق كيىمدەرىمىزگە قاراڭىزدارشى، ولاردى سيپاتتاۋعا ءسوز جەتپەيدى. ولاردىڭ ارتىندا تۇتاس ءبىر مادەنيەت، عاسىرلىق ءداستۇر جاتىر،" - دەدى ول.
سپيكەر تۇركى حالىقتارىنا ورتاق ايەلدەردىڭ ۇلتتىق باس كيىمدەرىنىڭ الۋان تۇرلىلىگىنە ەرەكشە توقتالدى. ءار باس كيىم جەكە ءبىر تاريح، جەكە ءبىر كۇرەس جولى. احمەت ءتۇزۇننىڭ پىكىرىنشە، تۇركى دۇنيەسىنىڭ مادەنيەت فەستيۆالدەرى قاتارىندا مىندەتتى تۇردە ورتاق تۇركى الەمى مۋزىكا فەستيۆالى وتكىزىلۋگە ءتيىس.
"جاس دارىنداردى تانىتاتىن، ءتىپتى الەمدىك دەڭگەيدەگى ونەرپازدار شىعاتىن ۇلكەن مادەني الاڭ جاساۋىمىز كەرەك،" - دەدى ول.
سونىمەن بىرگە ول مادەنيەتپەن ساباقتاس حالىقارالىق سپورت ءىس-شارالارىنىڭ دا ماڭىزىن اتاپ ءوتتى. ۆەنگريادا ەكى جىلدا ءبىر وتەتىن تۇران قۇرىلتايى، الەمنىڭ تۇكپىر-تۇكپىرىنەن تۇركى حالىقتارىن جينايتىن بىرەگەي وقيعا. موڭعولياداعى ناادام فەستيۆالى، تۇرىكمەنستانداعى اق بايرام، ياكۋتياداعى ىسىاح مەيرامى، تاتارستانداعى سابانتۋي، تۇركياداعى 666 جىلدىق تاريحى بار Kırk Pınar كۇرەس سايىستارى - مۇنىڭ ءبارى تۇركى مادەنيەتىنىڭ قۋاتىن كورسەتەتىن ءىس-شارالار.
احمەت ءتۇزۇننىڭ ايتۋىنشا، تۇركى حالىقتارىنىڭ الدىندا تۇرعان ەڭ باستى مىندەتتەردىڭ ءبىرى ءوز مادەني مۇراسىن تەرەڭ تانىپ، ونى الەمگە تانىتا ءبىلۋ.
"ءبىزدىڭ ەلدەرىمىزگە كەلەتىن شەتەلدىكتەر تەك سپورت نەمەسە ونەر ءۇشىن عانا ەمەس، تۇتاس مادەنيەتتى،تاريحىمىزدى، ءداستۇرىمىزدى، رۋحاني مۇرامىزدى كورۋ ءۇشىن كەلۋى كەرەك،" - دەدى سپيكەر.
ونىڭ بۇل ويلارى فورۋم قاتىسۋشىلارىنا تۇركى دۇنيەسىنىڭ باي مادەني الەۋەتىن پاش ەتىپ، وسى مۇرانىڭ جاھاندىق دەڭگەيدە ناسيحاتتالۋى قانشالىقتى ماڭىزدى ەكەنىنەن حاباردار ەتتى.