2025 جىل الماتى قالاسى ءۇشىن جاستار ساياساتى مەن حالىقارالىق جاستار ىنتىماقتاستىعىن دامىتۋ جولىنداعى ماڭىزدى كەزەڭگە اينالدى، - دەپ حابارلايدى Aqshamnews.kz.
بۇل تۋرالى الماتى قالاسىنىڭ جاستار ساياساتى باسقارماسىنىڭ وكىلدەرى حابارلادى.
تاريحتا تۇڭعىش رەت الماتىعا «تۇركى الەمىنىڭ جاستار استاناسى – 2025» مارتەبەسى بەرىلىپ، بۇل شاھاردىڭ تۇركى مەملەكەتتەرى جاستارىنىڭ باستاماسىن بىرىكتىرەتىن، پىكىر الماسۋ مەن مادەني ىقپالداستىقتىڭ التىن كوپىرىنە اينالعانىن ايعاقتادى.
اتالعان مارتەبەنىڭ رەسمي اشىلۋ سالتاناتى 2025 جىلى 18 تامىزدا تۇركى مەملەكەتتەرى ۇيىمىنىڭ (تمۇ) IV حالىقارالىق جاستار فەستيۆالى اياسىندا ءوتتى. سالتاناتتى جيىنعا ءازىربايجان، قازاقستان، قىرعىزستان، تۇركيا جانە وزبەكستاننان كەلگەن بەس مەملەكەتتىڭ وكىلدەرى قاتىستى. ءار ۇلتتىق دەلەگاسيا 10 ادامنان قۇرالدى. سونىمەن قاتار ءىس-شاراعا باقىلاۋشى مەملەكەتتەر – ۆەنگريا مەن تۇرىكمەنستاننان كەلگەن دەلەگاتتار قاتىستى.
تۇركى الەمىنىڭ جاستار استاناسى مارتەبەسى الماتىعا 2024 جىلى وسى ميسسيانى اتقارعان لەنكەران قالاسىنان (ءازىربايجان) رەسمي تۇردە تابىستالدى. الماتى جاستارىنا سيمۆولدىق كىلتتىڭ بەرىلۋى باۋىرلاستىقتىڭ، ورتاق قۇندىلىقتاردىڭ ساباقتاستىعى مەن حالىقارالىق جاستار ىنتىماقتاستىعىن نىعايتۋدىڭ جارقىن كورىنىسى بولدى. بۇل شەشىم تۇركى مەملەكەتتەرى ۇيىمىنىڭ جاستار جانە سپورت ىستەرى جونىندەگى مينيسترلەرىنىڭ VIII وتىرىسىندا قابىلدانعان ەدى.
2025 جىلى تۇركى الەمىنىڭ جاستار استاناسى مارتەبەسى اياسىندا جانە تمۇ-نىڭ قولداۋى مەن قاتىسۋىمەن الماتىدا ءبىرقاتار ماڭىزدى حالىقارالىق ءىس-شارا ۇيىمداستىرىلدى. اتاپ ايتقاندا، جاستار الماسۋىنىڭ 3-باعدارلاماسى، جاس كوشباسشىلار مەن كاسىپكەرلەردىڭ كەزدەسۋى، Turki Fest Almaty-2025 مادەني فەستيۆالى جانە «جايدارمان» حالىقارالىق TURKI CUP-2025 فەستيۆالى جوعارى دەڭگەيدە ءوتتى.
«الماتىعا تۇركى الەمىنىڭ جاستار استاناسى مارتەبەسىنىڭ بەرىلۋى قالادا جاستارمەن جۇيەلى ءارى ماقساتتى جۇمىس جۇرگىزىلىپ كەلە جاتقانىن كورسەتەدى. ءبىز ءۇشىن جاستار ساياساتى ناقتى مۇمكىندىكتەرگە – دامۋ، ديالوگ جانە حالىقارالىق ىنتىماقتاستىققا نەگىزدەلۋى اسا ماڭىزدى. 2025 جىلى الماتى تۇركى ەلدەرىنىڭ جاستارى ءبىر-بىرىنىڭ مادەنيەتىن تانىپ قانا قويماي، بولاشاققا باعىتتالعان ورتاق يدەيالاردى بىرگە قالىپتاستىرعان كەڭىستىككە اينالدى»، – دەدى الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك.
جاستار استاناسى جىلى اياسىندا جاستار باستامالارىن دامىتۋعا، ەرىكتىلەر قوزعالىسىن قولداۋعا جانە جاس بۋىندى الەۋمەتتىك ءارى قوعامدىق ۇدەرىستەرگە كەڭىنەن تارتۋعا ەرەكشە كوڭىل ءبولىندى.
2025 جىلى تۇركى الەمى جاستارىنىڭ استاناسى مارتەبەسىن ىسكە اسىرۋ حالىقارالىق بايلانىستاردى كەڭەيتۋگە، تاجىريبە الماسۋعا جانە جاستار ىنتىماقتاستىعىن ودان ءارى دامىتۋ ءۇشىن جاعداي جاساۋعا مۇمكىندىك بەردى.
سونىمەن قاتار، 2026 جىلى دا تۇركى مەملەكەتتەرى اراسىنداعى جاستار ىنتىماقتاستىعىن دامىتۋ جالعاسىن تابادى. الماتىدا «Digital Turkic Youth» فورۋمى، تۇركى مەملەكەتتەرى ۇيىمى جاستار پلاتفورماسىنىڭ III باس اسسامبلەياسى، V حالىقارالىق جاستار لاگەرىنىڭ وتكىزىلۋى جانە تمۇ ەلدەرى اراسىندا ستۋدەنتتىك ەكولوگيالىق حابتىڭ قۇرىلۋى جوسپارلانعان. جىل قورىتىندىسى رەتىندە تۇركى الەمىنىڭ جاستار استاناسى مارتەبەسىن جابۋ ءراسىمى ءوتىپ، ەستافەتا كەلەسى قالاعا تابىستالادى.