پرەزيدەنتتىڭ جىل باسىنداعى ءداستۇرلى سۇحباتى قازاقستانداعى مەملەكەتتىك-ساياسي ديسكۋرستىڭ ورنىقتى ۇلگىسىنە اينالدى. بۇل – مەملەكەت باسشىسىنىڭ ەل دامۋىنىڭ ستراتەگيالىق باعىتىن ايقىنداپ، قوعامدىق ساناعا نەگىزگى قۇندىلىقتار مەن باسىمدىقتاردى سىڭىرۋگە باعىتتالعان ماڭىزدى يدەولوگيالىق قۇجات. سۇحباتتا كوتەرىلگەن ماسەلەلەر ساياسي تۇراقتىلىق، الەۋمەتتىك جاۋاپكەرشىلىك جانە ۇلتتىق بىرەگەيلىك كونتەكسىندە سارالانىپ، بيلىك پەن قوعام اراسىنداعى ءوزارا سەنىمدى نىعايتۋعا قىزمەت ەتەدى. بيىلعى سۇحباتتىڭ «Turkistan» گازەتىندە جاريالانۋى رۋحاني-مادەني كەڭىستىكتىڭ مەملەكەتتىك يدەولوگيامەن ساباقتاستىعىن كورسەتىپ، ۇلتتىق دامۋ مودەلىنىڭ مازمۇندىق وزەگىن تەرەڭدەتە ءتۇستى.
ەل پرەزيدەنتى ءسوز باسىندا قازىرگى بۇقارالىق اقپارات قۇرالدارىنىڭ، ونىڭ ىشىندە گازەت باسىلىمدارىنىڭ قوعامداعى ءرولى ارتىپ كەلە جاتقانىن اتاپ ءوتتى. مەملەكەت باسشىسى ءداستۇرلى ءباسپاسوزدى قوعامدىق پىكىر قالىپتاستىرۋدىڭ، سونداي-اق ادامنىڭ دامۋىنا ىقپال ەتەتىن كوممۋنيكاسيالىق قۇرالدىڭ ءبىرى رەتىندە باعالادى.
سۇحبات بارىسىندا پرەزيدەنت وتكەن جىلعا قورىتىندى جاساپ، الداعى كەزەڭگە ارنالعان باسىم جوسپارلاردى ايقىندادى. بىلتىر باستاۋ الىپ، قوعامدا كەڭ تالقىعا تۇسكەن سالىق كودەكسىن جاڭارتۋ ماسەلەسى، ەكونوميكالىق رەفورمالاردىڭ مازمۇنى مەن باعىتى، اۋىل شارۋاشىلىعى سالاسىنداعى وزەكتى پروبلەمالار اشىق ايتىلدى. جاساندى ينتەللەكتىنى دامىتۋ باعدارلاماسى، سونداي-اق الەۋمەتتىك قولداۋ جۇيەسىنىڭ كەشەگىسى مەن بۇگىنى جان-جاقتى تالداندى. بۇل – ەلدىڭ تۇراقتى دامۋى مەن الەۋمەتتىك ادىلەتتىلىكتى قامتاماسىز ەتۋگە باعدارلانعان مەملەكەتتىك ساياساتتىڭ ستراتەگيالىق نەگىزىن ايقىندايدى.
سونىمەن قاتار، قاسىم-جومارت كەمەل ۇلى 2025 جىلدىڭ ماڭىزدى جەتىستىگىنىڭ ءبىرى – قازاقستاننىڭ حالىقارالىق ارەناداعى بەدەلىنىڭ ارتقانىن اتاپ ءوتتى. مىسالى، ۆاشينگتون، ماسكەۋ، بەيجىڭ، انكارا، ابۋ-دابي، تاشكەنت، دۋشانبە، بىشكەك، اشحاباد جانە توكيو قالالارىنداعى رەسمي ءىسساپارلاردىڭ ناتيجەسىن ايتتى. اسىرەسە، بۇۇ باس اسسامبلەياسىنىڭ مەرەيتويلىق سەسسياسىندا قازاقستاننىڭ وسى امبەباپ جاھاندىق ۇيىمدى رەفورمالاۋعا قاتىستى ۇستانىمىن ەگجەي-تەگجەيلى جەتكىزگەنىنە توقتالدى.
پرەزيدەنتتىڭ بيىلعى سۇحباتى ءداستۇرلى فورماتتان گورى اشىق ءارى مازمۇندى ديالوگ رەتىندە ءوربىدى. مەملەكەت باسشىسى قوعام نازارىن اۋدارعان ماسەلەلەرگە ەل مۇددەسى تۇرعىسىنان بايىپتى كوزقاراس تانىتتى. ەشكىمدى الالاماي، ءار ازاماتتىڭ ەڭبەگىن ءادىل باعالاۋ – مەملەكەتشىل سانانىڭ باستى ولشەمى ەكەنىن اتاپ وتكەن. الداعى ۋاقىتتا ىرگەلى كونستيتۋسيالىق رەفورمالارعا قاتىستى رەفەرەندۋم وتەتىنىن جانە اتا زاڭعا وزگەرىستەر ەنگىزۋ باعىتىندا جۇيەلى جۇمىس ءجۇرىپ جاتقانىن دا حاباردار ەتتى.
اڭگىمە بارىسىندا ەل تاريحىنا قاتىستى قويىلعان سۇراققا جاۋاپ بەرە وتىرىپ، پرەزيدەنت: «تاريح جۇرتتى داۋلاستىراتىن نەمەسە جاۋلاستىراتىن تاقىرىپ ەمەس، كەرىسىنشە، قوعامدى ۇيىستىراتىن قۇندىلىق بولۋعا ءتيىس. اقيقاتقا نەگىزدەلگەن تاريح بىزگە وتكەننەن تاعىلىم الىپ، كەمشىلىكتەرىمىزدى تۇزەتۋ ارقىلى بولاشاققا سەنىممەن قادام باسۋدى ۇيرەتەدى»، – دەدى. وسى تۇرعىدا پرەزيدەنت حاكىم ابايدىڭ مۇراسىن كەڭىنەن دارىپتەۋ ماڭىزدىلىعىن ەسكەرىپ، ۇلى ويشىلدىڭ «تولىق ادام» ءىلىمى مەن «قارا سوزدەرىنىڭ» بۇگىنگى قوعام ءۇشىن وزەكتىلىگىن العا تارتتى.
جالپى سۇحباتتا قامتىلعان مەملەكەتتىك اۋقىمدى تاقىرىپتار وتە كوپ. مەملەكەت باسشىسى «زاڭ مەن ءتارتىپ»، «تازا قازاقستان» باعدارلامالارى اياسىنداعى جۇمىستاردى كۇشەيتۋ قاجەتتىگىن، جاستارعا ەڭبەكقورلىق، بىلىمگە قۇشتارلىق پەن ادامگەرشىلىك قۇندىلىقتاردى كەڭىنەن ناسيحاتتاۋ كەرەگىنە دە توقتالعان. سونىمەن قاتار، سيفرلىق ءداۋىر تالاپتارىنا ساي عىلىم مەن ءبىلىم سالاسىندا جاساندى ينتەللەكتىنىڭ ءرولىن ارتتىرۋ قاجەتتىگىنە نازار اۋداردى.
پرەزيدەنت 2026 جىلى تاۋەلسىزدىكتىڭ 35 جىلدىعى ەل تاريحىنداعى ماڭىزدى داتا ەكەنىن ەسكە سالدى. ونىڭ ايتۋىنشا، بۇل كەزەڭ – وتكەن جولدى سارالاپ، بولاشاققا ستراتەگيالىق جوسپارلاردى ايقىندايتىن جاۋاپتى ءسات. سونداي-اق، مەملەكەت باسشىسى قازاقستان باستاماسىمەن بىرىككەن ۇلتتار ۇيىمى 2026 جىلدى «حالىقارالىق ەرىكتىلەر جىلى» دەپ جاريالاعانىن، بۇل شەشىمنىڭ «تازا قازاقستان» يدەياسىمەن تولىق ۇندەسەتىنىن جەتكىزدى.
ءسوز سوڭىندا، پرەزيدەنت جەكە ومىرلىك ۇستانىمدارىنا دا توقتالىپ، جاۋاپكەرشىلىك پەن ادالدىقتى باستى قاعيدا سانايتىنىن اتاپ ءوتتى. «مەن – مەملەكەتشىل اداممىن» دەگەن ءسوزى مەملەكەت باسشىسىنىڭ ساياسي بولمىسى مەن قىزمەتىنىڭ ءمانىن ايقىن كورسەتەتىن ءتۇيىندى تۇجىرىم. سوندىقتان، پرەزيدەنت سۇحباتى ساياسي-يدەولوگيالىق ۇلتتىق بىرەگەيلىكتى نىعايتۋعا، قوعامدىق سەنىمدىلىكتى ارتتىرۋعا جانە ەلدىڭ ستراتەگيالىق دامۋ باسىمدىقتارىن ايقىنداۋعا باعىتتالعان ماڭىزدى قۇجات ەكەنى انىق.