5 قاڭتاردا مەملەكەت باسشىسى قاسىم-جومارت توقايەۆ "Turkistan" گازەتىنە بەرگەن سۇحباتىندا الەۋمەتتىك جەلى ادامنىڭ ويلاۋ قابىلەتىنە زيانى بارىن ايتىپ، "جاسى قىرىققا جەتسە دە، ءبىلىمى مەن ءوي-ورىسى ون بەس جاستاعى جاسوسپىرىمدەر دەڭگەيىندە قالىپ قويعان ازاماتتار" بارىن اتاپ ءوتتى. بۇعان قاتىستى پسيحولوگتار نە دەيدى؟ تولىعىراق اqshamnews.kz ماتەريالىندا.
پسيحولوگ ولگا ءرومانيۆتىڭ ايتۋىنشا، الەۋمەتتىك جەلىنىڭ كەسىرىنەن ءوز ءومىرىن قىزىقسىز دەپ سانايتىن ادامداردا جىبەرىپ العان مۇمكىندىكتەر سيندرومى (FOMO) قالىپتاسادى. بۇل كۇي وزگەلەرگە قىزعانىشتى كۇشەيتەدى.
FOMO كەزىندە ادام باسقالاردىڭ نە ىستەپ جۇرگەنىن ۇنەمى باقىلاپ، ءوزىن ولارمەن سالىستىرۋعا بەيىم بولادى، ال بۇل ءوزىن-وزى باعالاۋدىڭ تومەندەۋىنە اكەلۋى ىقتيمال. پسيحولوگ بۇل سيندروم، مىسالى، ادام دوستارىنىڭ كەشتەن نە ساپاردان سالعان فوتولارىن كورگەندە ءورشۋى مۇمكىن ەكەنىن تۇسىندىرەدى: الەۋمەتتىك جەلىدە كوپشىلىك كۇندەلىكتى قاراپايىم ساتتەردى ەمەس، ءومىرىنىڭ "ەڭ ءمىنسىز كەلبەتىن" عانا كورسەتەدى. سونىڭ سالدارىنان ينتەرنەتتەن بىرەۋدىڭ تەك جاقسى قىرلارىن كورگەن باسقا ادامدار ءوز ومىرىنە كوڭىلى تولماي، ءتۇڭىلىپ كەتۋى مۇمكىن.
ەگەر ادام جەلىدەگى وزگەنىڭ ءومىرىن باقىلاعاندا قىزعانىش پەن جايسىزدىق تۋدىراتىنىن تۇسىنسە، ۆيرتۋاى الەمدە وتكىزەتىن ۋاقىتىن قىسقارتقانى ءجون. بالاما رەتىندە تىم كوپ ماقتاناتىن ادامدارعا جازىلۋدان باس تارتۋعا بولادى. سونداي-اق، قۋانىش سىيلايتىن دۇنيەلەر تۋرالى، مىسالى، كۇندەلىككە جازىپ ءجۇرۋ نازاردى ءوز ىشكى سەزىمدەرىنە بۇرۋعا كومەكتەسەدى.
پسيحولوگ بار نارسەنىڭ ءقادىرىن ءبىلۋ ماڭىزدى دەيدى: ءۇي، دەنساۋلىق، وتباسى سياقتى قۇندىلىقتاردى باعالاۋ قاجەت. كەيدە تابىس پەن قىزىق قۋعان اسىعىستىقتى باسەڭدەتىپ، بولىپ جاتقان ءساتتى تولىق سەزىنىپ، ءومىردى تەرەڭىرەك "تۇشىپ" كورۋ الدەقايدا دۇرىس.
"باياۋلاۋدىڭ جاقسى ءتاسىلى - سانالى زەيىن (مايندفۋلنەس): قازىرگى ساتتە وزىڭە، سەزىمدەرىڭە جانە ارەكەتتەرىڭە نازار اۋدارۋ. بۇل شاي دايىنداۋ نەمەسە اسىقپاي تاماقتانىپ، ونىڭ ءدامىن سەزىنۋ سياقتى قاراپايىم ادەتتەردەن باستالادى"، - دەپ تۇيىندەيدى ول.