بىلتىر قۇنى 27 ملرد تەڭگە بولاتىن 28 ينفراقۇرىلىمدىق جوبا ىسكە اسىرىلعان. بۇل تۋرالى ۇكىمەت وتىرىسىندا بايانداما جاساعان مادەنيەت جانە سپورت ءمينيسترى اسحات ورالوۆ ءمالىم ەتتى، دەپ حابارلايدى Almaty-akshamy.kz.
«ەلىمىزدە تۋريستىك ينفراقۇرىلىمدى دامىتۋ بويىنشا جۇمىستار جالعاسۋدا. مىسالى، وتكەن جىلى قۇنى 27 ملرد تەڭگە بولاتىن 28 ينفراقۇرىلىمدىق جوبا ىسكە اسىرىلدى. وسى جوبالاردىڭ ىشىندە بالقاش كۋرورتتىق ايماعىندا ينجەنەرلىك كوممۋنيكاسيالار سالۋ، اقتاۋ قالاسىنىڭ جىلى جاعاجايىنا دەيىن اۆتوكولىك جولىنىڭ قۇرىلىسى اسا ماڭىزدى بولىپ سانالادى. سونىمەن قاتار، ءۇشارال جانە ءۇرجار اۋەجايلارىنىڭ ىسكە قوسىلۋى ماڭىزدى وقيعا بولدى، بۇل اۋە تاسىمالى مۇمكىندىكتەرىن ەداۋىر كەڭەيتتى»، - دەدى مينيستر.
ونىڭ ايتۋىنشا، بيىل 439،3 ملرد تەڭگەگە 83 ينفراقۇرىلىمدىق جوبا ىسكە اسىپ جاتىر.
«تۋريستىك ينفراقۇرىلىمدى دامىتۋ پروبلەماسىن شەشۋ ماقساتىندا ەلدى مەكەندەردەن تىس جەرلەردە جانە ۇلتتىق پاركتەر اۋماعىندا اكىمدىكتەرگە ءتيىستى قۇزىرەت بەرۋ بويىنشا جۇمىستار جۇرگىزىلۋدە»، - دەپ توقتالدى اسحات ورالوۆ.