ب ا ق وكىلدەرىنە مارتەبە بەرىپ، تۇرعىن ءۇي كەزەگىنە قويۋ مۇمكىن ەمەس - دەپۋتات

بۇل تۋرالى ءماجىلىس دەپۋتاتى ەلنۇر بەيسەنبايەۆ ايتتى، دەپ حابارلايدى Almaty-akshamy.kz.

«جۋرناليستەرگە قاتىستى ءبىر شىندىقتىڭ بەتىن اشىپ الايىق. جاڭا ازىرلەنگەن زاڭنامانىڭ اياسىندا ب ا ق وكىلدەرىن ارنايى ءبىر تۇرعىن ءۇي باعدارلاماسى ارقىلى كەزەككە قويۋ، مارتەبە بەرۋدى تۇرعىن ءۇي تۋرالى زاڭناماعا ەنگىزە المايمىز. «ماسس-مەديا» تۋرالى زاڭ پارلامەنتتىڭ قاراۋىنا ەنگەننەن كەيىن جۋرناليستەر دەپۋتاتتاردان الەۋمەتتىك ماسەلەلەر بويىنشا كوپ نارسە كۇتپەۋى قاجەت»، - دەدى ەلنۇر بەيسەنبايەۆ ماجىلىستە «ماسس-مەديا» تۋرالى زاڭ جوباسىن تالقىلاۋ بارىسىندا.

سونداي-اق، حالىق قالاۋلىسى اتالعان ماسەلەنى شەشۋ بويىنشا ءوز ۇسىنىسىن العا تارتتى.

«مينيسترلىك قازىردەن باستاپ «وتباسى بانك» جانە ەكىنشى دەڭگەيلى باسقا دا بانكتەرمەن كەلىسىم جۇرگىزۋى كەرەك. تۇرعىن ءۇي ماسەلەسىن شەشۋدىڭ جولدارىن بىرلەسىپ قاراستىرعان ءجون. ءبىزدى ءقازىر قاراپ، تىڭداپ وتىرعان جۋرناليستەر ويلاماۋى قاجەت، ءبىز ولاردى ءبىر كۇندە كاتەگورياعا ەنگىزەمىز دەپ. ويتكەنى، ءار ماماندىقتى كاتەگورياعا ەنگىزۋ مۇمكىن ەمەس. بۇگىندە 650 مىڭنان استام ازامات باسپانا كەزەگىندە تۇر. جىل سايىن تۇرعىن ءۇي كەزەگىنە تۇراتىن ازاماتتاردىڭ سانى 40-50 مىڭ ارالىعىندا ءوسىپ وتىرادى. سوندىقتان بۇل ماسەلە «ماسس-مەديا» تۋرالى زاڭنىڭ اياسىندا شەشىلمەيدى»، - دەيدى دەپۋتات.