تەڭدەسسىز سۇلۋ تابيعاتى مەن وزىندىك بىرەگەي مادەنيەتى كوزىقاراقتى جۇرتتى ءتانتى ەتپەي قويمايتىن قازاق جەرى – تۋريزم ءۇشىن تاپتىرماس مەكەن. باعاسىن بىلگەن ادامعا تاماشا اسەر، كەرەمەت كوڭىل كۇي سىيلايتىن تاريحي-مادەني قۇندىلىعى زور نىساندار بىزدە جەتىپ-ارتىلادى. ءتۋريزمنىڭ دامۋىنا قۋاتتى سەرپىن بەرەتىن بۇل جاعداي ەلىمىزدىڭ الەمدىك دەڭگەيدەگى تۋريستىك نارىققا شىعۋىنا جول اشارى انىق.
الەۋمەتتىك ماڭىزىنان بولەك، ەكونوميكالىق جاعىنان دا اسا ءتيىمدى بۇل سالانى دامىتۋ ماسەلەسىنە مەملەكەت باسشىسى قاسىم-جومارت توقايەۆ تا ۇنەمى نازار اۋدارتىپ ءجۇر. تاياۋداعى جولداۋىندا ەل تاعدىرى ءۇشىن ايرىقشا ماڭىزى بار جوبالاردى جۇزەگە اسىرۋ تۋرالى ءسوز قوزعاي كەلە، پرەزيدەنت ەلىمىزدىڭ تۋريستىك الەۋەتىن ءتيىمدى پايدالانۋ كەرەكتىگىن باسا ايتتى. ول سونداي-اق سەرپىندى جوبالار قاتارىندا بولۋعا ءتيىس وسىناۋ ماڭىزدى سالادا، وكىنىشكە قاراي، جۇمىس دۇرىس اتقارىلماي جاتقانىن، ەلىمىز باسقا مەملەكەتتەرمەن سالىستىرعاندا ارتتا قالىپ قويعانىن مالىمدەدى.
ال ەكونوميكانىڭ لوكوماتيۆى بولار الەۋەتكە يە سالانىڭ كەنجەلەپ دامىپ، تۇرالاپ تۇرعانىنا نە سەبەپ؟ وتانداستارىمىز دەمالۋعا نەگە جاپپاي شەت ەلدەرگە اعىلادى؟ ىشكى تۋريزمگە قىزىعۋشىلىقتىڭ تومەن بولۋى نەدەن؟..
ەلىمىزدەگى تۋريستىك وپەراتورلار اسسوسياسياسىنىڭ مالىمەتىنشە، بيىل جازدا شەتەلگە ساياحاتقا جولداما ساتىپ العاندار سانى بىلتىرعىمەن سالىستىرعاندا ەكى ەسە وسكەن. ماماندار مۇنى ۆيزاسىز كىرۋگە بولاتىن مەملەكەتتەر قاتارى كوبەيگەنىمەن جانە جاڭا باعىتتار، تىكە رەيستەر اشىلعانىمەن تۇسىندىرەدى. ەگەر وتانداستارىمىز بىلتىر تىكە رەيسپەن 12 ەلگە بارا العان بولسا، بيىل ولاردىڭ دا سانى ەكى ەسەگە ارتقان.
قازاقستان تۋريستىك اسسوسياسياسىنىڭ ديرەكتورى راشيدا شايكەنوۆانىڭ ايتۋىنشا، تۋريستىك باعىتتى تاڭداۋداعى نەگىزگى فاكتوردىڭ ءبىرى – ونىڭ باعاسى. بۇعان دەيىن قولجەتىمدى باعىتتىڭ كوش باسىندا تۇركيا تۇرعان جانە ازىن-اۋلاق اقشامەن-اق تۇرىك ەلىندە قىدىرىپ، تەڭىز جاعاجايلارىندا تىنىعىپ قايتۋ قيىنعا تۇسپەگەن. الايدا ءليردىڭ قۇنسىزدانۋىنا بايلانىستى، بۇگىندە تۇركيا ەكىنشى ورىنعا ىسىرىلعان. قازاقستاندىق تۋريستەردى ءقازىر كوبىرەك قىزىقتىراتىنى – دۋباي، ەگيپەت، تايلاند، گرۋزيا، ازەربايجان، چەرنوگوريا كورىنەدى.
ال ىشكى تۋريزمگە قاتىستى جاعداي الدەقايدا كۇردەلى. ەلىمىزدە الدەبىر دەمالىس ورنىن نەمەسە تۋريستىك نىساندى ارنايى تاڭداپ، تۋريستىك ماقساتتا ۇزاق مەرزىمگە ساپار شەگەتىندەر نەكەن-ساياق. ەل اۋماعىنداعى بارىس-كەلىستىڭ دەنى ادامداردىڭ باسقا ايماقتاعى تۋعان-تۋىسىنا، دوس-جارانىنا قىدىرىپ قايتۋى، ەمدەۋ-ساۋىقتىرۋ مەكەمەلەرىنە بارۋى، ىسكەرلىك جانە كاسىبي ماقساتتاعى ساپارى، قاسيەتتى ورىنداردى زيارات ەتۋى تۇرىندە بولىپ كەلەدى ەكەن. سونداي-اق سەنبى-جەكسەنبى كۇندەرى ۇيىمداستىرىلاتىن 1-2 كۇندىك تۋرمەن تۇرعىلىقتى جەرىنە جاقىن تاريحي-مادەني نىساندارعا، كورىكتى جەرلەرگە ساياحاتتايتىندار دا بار. مۇنداي نىساندار قاتارىنا اتاقتى كولساي كولى، بەسشاتىر قورعانى، شارىن شاتقالى، تامعالى-تاس، ايعاي قۇم، تۇرگەن سارقىراماسى باعىتىن قوسۋعا بولادى. ال جۇرتتىڭ دەمالۋعا نەعۇرلىم كوبىرەك جانە ۇزاق مەرزىمگە باراتىن جەرى – الاكول، بالقاش، بۋراباي جانە كاسپيي جاعالاۋى.
ىشكى ءتۋريزمنىڭ تۇيتكىلدى تۇستارىن جۇرتتار الەۋمەتتىك جەلىدە، باسپا ءسوز بەتىندە ءجيى ايتىپ تا، جازىپ تا ءجۇر. نەعۇرلىم كوبىرەك ءسوز بولاتىنى – باعانىڭ كورسەتىلەر قىزمەت ساپاسىنا ساي ەمەستىگى. مۇنىڭ سىرتىندا جول قاتىناسى ينفراسترۋكتۋراسىنىڭ دامىماعاندىعى، سەرۆيس پەن لوگيستيكا دەڭگەيىنىڭ تومەندىگى، تۋريستەرگە ۇسىنىلار ازىق-تۇلىك ساپاسىنىڭ ناشارلىعى، اسسورتيمەنت جەتىمسىزدىگى، تۋريستىك نىساندارداعى قاۋىپسىزدىكتى قامتاماسىز ەتۋ دەڭگەيىنىڭ سىن كوتەرمەۋى، بىلىكتى مامانداردىڭ ازدىعى، تۋريستىك الەۋەتتى ايماقتىق جانە الەمدىك دەڭگەيدە كوتەرۋگە قاتىستى قارەكەتسىزدىك تاعى بار.
جالپى، وتانداستارىمىزدىڭ كوپشىلىگى ەل اۋماعىنداعى ءتۋريزمنىڭ قىمباتقا تۇسەتىنىنە شاعىنىپ، باعانى ارزانداتۋدى سۇرايدى. ال اتالعان قىزمەتتى ۇسىنۋشىلار بولسا ول مۇمكىن ەمەستىگىن، كەز كەلگەن بيزنەس سياقتى، تۋريزم دە رەنتابەلدى بولۋعا ءتيىس ەكەنىن ايتادى. كاسىپكەرلەردىڭ پىكىرىنشە، تۋريستىك قىزمەتتەن ءقازىر ايتارلىقتاي كىرىس جوق. وعان تەڭگەنىڭ قۇنسىزدانۋى، كوممۋنالدىق قىزمەت، ەلەكتر ەنەرگياسى، سۋمەن جابدىقتاۋ باعاسىنىڭ ءوسۋى دە سەبەپ بولۋدا. وسىنىڭ ءبارى، اينالىپ كەلگەندە، وتاندىق ءتۋريزمدى بارىنشا دامىتۋعا كەدەرگى بولىپ تۇرعانى انىق.
دەگەنمەن، داتكە قۋات، كوڭىلگە شۋاق ۇيالاتاتىن جايتتار دا جوق ەمەس. مىسالى، بىزدە ەل اۋماعىنداعى دەمالىس ورىندارىنا اتا-اناسىمەن باراتىن بالالاردىڭ تەگىن ۇشۋىنا مۇمكىندىك بەرەتىن باعدارلاما بار. سونداي-اق مينيسترلىك تاراپىنان ۇلىتاۋ، اباي وبلىستارى مەن باسقا دا ءبىرقاتار باعىتتاردى دامىتۋ ماقساتىندا ەلىمىزدە تۋريستەرگە جۇمساعان اقشاسىنىڭ 20 پايىزىن قايتارىپ بەرەتىن كەشبەك جۇيەسىن ەنگىزۋ قاراستىرىلۋدا.
مۇنىڭ سىرتىندا مادەنيەت جانە سپورت مينيسترلىگىنىڭ تۋريزم جانە سپورت مينيسترلىگى بولىپ قايتا قۇرىلۋى دا ءتۋريزمدى ەلىمىزدىڭ ەكونوميكالىق دامۋىنىڭ باسىم باعىتىنا اينالدىرۋ ماقساتىنان تۋىنداعانىنا سەنگىمىز كەلەدى.
تەگي: جولداۋ، تۋريزم، ينفراسترۋكتۋرا