الماتىدا تۋريزم سالاسىندا ىنتىماقتاستىق تۋرالى مەموراندۋمعا قول قويۋ ءراسىمى ءوتتى.
Kazakh Tourism، Air Astana جانە وڭتۇستىك كورەيانىڭ ۇلتتىق تۋريزم ۇيىمى تۋريزم سالاسىنداعى ىنتىماقتاستىق تۋرالى مەموراندۋمعا قول قويدى.
ەلىمىز كورەيا رەسپۋبليكاسىمەن ىسكەرلىك تىعىز بايلانىستا. ىنتىماقتاستىق تۋرالى مەموراندۋمعا قول قويۋ قازاقستان ءتۋريزىمىنىڭ ودان ءارى دامۋىنا دەگەن تاعى ءبىر قادام بولماق.
مەموراندۋمعا قول قويعان تاراپتار تاجىريبە الماسۋعا جانە ارىپتەستىك قاتىناستاردى نىعايتۋ ارقىلى تۋريزم سالاسىنداعى ءوزارا ءىس-قيمىلدى دامىتۋعا نيەتتى.
Air Astana-نىڭ ماركەتينگ جانە ساتۋ جونىندەگى ۆيسە-پرەزيدەنتى ادەل داۋلەتبەك مەموراندۋم ەلدەردىڭ تۋريستىك جانە كۋرورتتىق ءىس سالاسىنداعى ىنتىماقتاستىعىن نىعايتاتىنىن، سونداي-اق تۋريستىك مارشرۋتتاردى ازىرلەۋ سالاسىنداعى بىرلەسكەن جوبالاردى ىسكە اسىرۋ ءۇشىن نەگىز بولاتىنىن اتاپ ءوتتى.
- Air Astana اۋەكومپانياسى وتكەن جىلى قازاقستان مەن وڭتۇستىك كورەيا اراسىندا 75 مىڭنان استام جولاۋشىنى تاسىمالدادى. بيىل ءبىرىنشى توقساننىڭ وزىندە 20 مىڭنان استام جولاۋشى اۋە جەلىلەرىنىڭ قىزمەتتەرىن پايدالاندى. بيىل جازدا Air Astana وڭتۇستىك كورەياعا اپتاسىنا 6 رەيستى Boeing ۇشاقتارىمەن ورىنداۋدى جوسپارلاپ وتىر. ءبىزدىڭ ودان ءارى ىنتىماقتاستىعىمىز 2 ەل اراسىنداعى جولاۋشىلار اعىنىن ودان ءارى كوبەيتەتىنىنە ۇمىتتەمىز. سونىمەن قاتار، 2 مەملەكەتتە دە ۆيزاسىز رەجيم جۇمىس ىستەيدى، بۇل تۋريستەر اعىنىن ارتتىرۋعا ىقپال ەتەدى”،– دەدى ادەل داۋلەتبەك.
كەلىسىم تاراپتارى تۋريستىك قىزمەت جانە ينۆەستيسيالىق مۇمكىندىكتەر ماسەلەلەرى بويىنشا اقپاراتتىق الماسۋدى ۇيىمداستىرۋعا، تۋريستىك قىزمەتتەر كورسەتەتىن ۇيىمدار اراسىندا تىكەلەي بايلانىس ورناتۋعا مۇمكىندىك بەرەدى. سونداي-اق، مەموراندۋم شەڭبەرىندە تۋريستەر اعىمى بويىنشا ءتيىمدى ىنتىماقتاستىق ءۇشىن كەدەندىك، شەكارالىق جانە كوشى-قون ماسەلەلەرى بويىنشا دەرەكتەر الماسۋ جوسپارلانۋدا. وسى ىنتىماقتاستىق ارقىلى مەملەكەت پەن بيزنەستىڭ ءوزارا ءىس-قيمىلى، سونداي-اق ءقاۋىپسىز تۋريزم (Travel bubbles) قۇرۋ جەكە ماسەلە بولىپ سانالادى.
وڭتۇستىك كورەيا ۇلتتىق تۋريزم ۇيىمىنىڭ پرەزيدەنتى كيم چان ءسيلدىڭ ايتۋىنشا، قازاقستان - وڭتۇستىك كورەياعا مەديسينالىق ماقساتتا تۋريستەردى جىبەرەتىن ءىرى ەلدەردىڭ ءبىرى. ەلدەردىڭ تىعىز بايلانىسى مەن تىكەلەي اۋە قاتىناسىنىڭ ارقاسىندا قازاقستاندىقتار ءبىزدىڭ ەلىمىزگە مەديسينالىق تۋريزم اياسىندا عانا ەمەس، ساياحاتتاپ كەلە الادى.
– كورەيا ۇكىمەتى 2023-2024 جىلداردى كورونوۆيرۋس پاندەمياسىنان كەيىن شەتەلدىك تۋريستەردى تارتۋ ماقساتىندا “كورەياعا باراتىن جىل” دەپ جاريالادى. بۇل كەزەڭنىڭ نەگىزگى ترەندتەرى - كورەي مادەنيەتىن ناسيحاتتاۋ جانە تۋريستىك الەۋەتتى دامىتۋ. قازاقستان ءوز كەزەگىندە تۋريزم سالاسىن جانداندىرۋ ءۇشىن بار كۇشىن سالۋدا. قازاقستاننىڭ تاريحى، مادەنيەتى مەن عاجاپ تابيعاتى بار. مۇنىڭ ءبارى كورەيادان كەلەتىن تۋريستەرگە قىزىق بولارى ءسوزسىز”، - دەپ اتاپ ءوتتى كيم چان سيل.
"Kazakh Tourism "ۇك" اق باسقارما ءتوراعاسى تالعات امانبايەۆ ءوز كەزەگىندە مەموراندۋمدى ىسكە اسىرۋ ءۇشىن 2 ەلدىڭ تۋريستىك ءونىمىنىڭ باسەكەگە قابىلەتتىلىگىن ارتتىرۋ، ەكوتۋريزمدى دامىتۋ، تۋريزم سالاسىن ىلگەرىلەتۋ جانە ءبىلىم بەرۋ بويىنشا كەشەندى شارالار قابىلداناتىنىن مالىمدەدى.
“Kazakh Tourism وڭتۇستىك كورەيالىق ارىپتەستەرىمەن ارىپتەستىك قارىم-قاتىناس ورناتقانىنا وتە قۋانىشتى. ءبىز بۇگىنگى كەلىسىم اياسىندا ماڭىزدى جوبالاردى ىسكە اسىرۋ ءۇشىن دەرەۋ جۇمىس توبىن قۇرامىز”، - دەدى تالعات امانبايەۆ.