الماتىدا UN Tourism (بۇۇ تۋريزم) ۇيىمىنىڭ تۋريستىك يندۋستريادا ايەلدەردىڭ قۇقىعى مەن مۇمكىندىگىن كەڭەيتۋ ماسەلەسىنە ارنالعان العاشقى وڭىرلىك كونفەرەنسياسى ءوتىپ جاتىر. ءىس-شارانى ۇيىم Almaty Tourism Bureau-مەن بىرلەسىپ ۇيىمداستىردى. كونفەرەنسيا ەۋروپا مەن ورتالىق ازيا ەلدەرىنىڭ ۇكىمەت وكىلدەرىن، حالىقارالىق ۇيىمداردى، بيزنەس پەن ۇكىمەتتىك ەمەس سەكتوردى بىرىكتىردى.
قازاقستان تۋريزم سالاسىنداعى گەندەرلىك تەڭسىزدىكپەن كۇرەسۋگە باعىتتالعان UN Tourismء-نىڭ Centre Stage اتتى فلاگماندىق باستاماسىنا بەلسەندى قاتىسىپ وتىر. باستامانىڭ نەگىزگى ماقساتى – ايەلدەردىڭ جەتەكشىلىك لاۋازىمدارعا، كاسىپكەرلىككە، تەحنولوگياعا جانە بىلىمگە قولجەتىمدىلىگىن كەڭەيتۋ.
كونفەرەنسيا اياسىندا وتكەن مينيسترلىك دەڭگەيىندەگى دوڭگەلەك ۇستەلدە گەندەرلىك تەڭدىكتى ىلگەرىلەتۋدەگى ساياسي ەرىك-جىگەردىڭ ماڭىزى تالقىلاندى. سونداي-اق، تۋريزم سالاسىنداعى ايەلدەر ءجيى كەزىگەتىن سيفرلىق تەڭسىزدىك پەن الەۋمەتتىك ستەرەوتيپتەر تاقىرىبىندا پانەلدىك سەسسيالار ءوتتى.
Centre Stage باستاماسى اياسىندا قازاقستاندا 200 ايەل-ماماندى وقىتۋ، اقپاراتتىق ناۋقان جۇرگىزۋ جانە ايەل-كاسىپكەرلەردى قولداۋعا ارنالعان ارنايى شارالار ازىرلەۋ جوسپارلانعان.
«ايەلدەر - قازاقستاندا جانە بۇكىل وڭىردە تۇراقتى ءتۋريزمنىڭ بولاشاعىن قالىپتاستىراتىن كۇش. Centre Stage باعدارلاماسى ارقىلى ءبىز ايەل-كاسىپكەرلەر مەن كاسىبي ماماندارعا قاجەت داعدى، قولداۋ مەن سەنىم ۇيالاتىپ، ولاردىڭ كوشباسشىلىق الەۋەتىن اشۋعا كومەكتەسەمىز»، – دەدى UN Tourism اتقارۋشى ديرەكتورى زوريسا ۋروشيەۆيچ.
الماتى قالاسى تۋريزم باسقارماسىندا بۇل كونفەرەنسيانىڭ قالا يندۋسترياسى ءۇشىن پايداسى ايتىلدى.
«بۇل كونفەرەنسيا جاي ءىرى حالىقارالىق ءىس-شارا ەمەس. بۇل الماتىنىڭ تۋريزمدەگى تەڭ مۇمكىندىكتەر مەن تۇراقتى دامۋعا باعىتتالعان جاھاندىق قوزعالىسقا قوسقان ۇلەسى. ايەلدەردىڭ كوشباسشىلىعىن، ولاردىڭ كاسىپكەرلىك الەۋەتىن قولداۋ – بۇكىل سالانىڭ وسۋىنە ستراتەگيالىق رەسۋرس. كونفەرەنسيانىڭ الماتىدا ءوتۋى تۋريزم يندۋسترياسىنا ايتارلىقتاي سەرپىن بەرەتىنىنە سەنىمدىمىز»، – دەدى الماتى قالاسى تۋريزم باسقارماسى باسشىسىنىڭ ورىنباسارى اقمارال ەشانوۆا.