جاپونيادا تۋريست تارتۋدىڭ تىڭ ءارى ءتيىمدى ءادىسى جۇزەگە اسا باستادى.
ساياحاتتاۋعا كەلگەن قوناقتاردى ريكشا ارباسىمەن ەر ازاماتتار ەمەس، قىز-كەلىنشەكتەر تاسيدى. سونداي-اق ولار جولاۋشىلارعا ەلدىڭ تاريحى، سالتى مەن مادەنيەتىنەن جاڭا مالىمەت بەرىپ، قوس مىندەتتى قاتار اتقارىپ ءجۇر، دەپ حابارلاستى Almaty-akshamy.kz 24.kz-كە سىلتەمە جاساپ.
ريكشا - وڭتۇستىك-شىعىس ازياداعى جاپونيادا كەڭ تارالعان كولىك. سالماعى 250 كەلىگە جەتەتىن اربا نەگىزىنەن ەر-ازاماتتارعا لايىقتاپ جاسالعان. ءبىراق نارىقتاعى سۇرانىس جۇرگىزۋشى قىز-كەلىنشەكتەردىڭ دە قاتارىن ارتتىردى.
ريۋتا نيسيو، «ريكشا جۇرگىزۋشىلەر بىرلەستىگىنىڭ» پرەزيدەنتى:
«ءبىزدىڭ كومپانياداعى 90 ريكشانىڭ 25ء-ىن ايەلدەر جۇرگىزەدى. نازىكتىگىنە قاراماستان ارۋلار اۋىر ريكشانى تىزگىندەپ ءجۇر. مىنگەن جولاۋشىلارعا توكيونىڭ تاماشا جەرلەرىن كورسەتىپ، تانىستىرىپ، مادەنيەتىمىزدى ۇلىقتايدى. سوندىقتان كەلەشەكتە ايەلدەرگە ريكشا جۇرگىزۋدى جەڭىلدەتەتىن قولايلى جاعداي قالىپتاستىرىپ، قاتارىن كوبەيتسەم بە دەيمىن».
كەيبىر قىزدار ءتىپتى ۇلتتىق كيىم كيىپ العان. وسىلايشا ولار قىزمەت كورسەتۋ ساپاسىن ارتتىرامىز دەيدى.
يۋكا اكيموتو، ريكشا جۇرگىزۋشىسى:
«العاشىندا ءبارى ماعان تاڭىرقاي قارايتىن. كەيدە جۇمىس بارىسىندا اربانى قۇلاتىپ العان ساتتەر دە بولدى. قوعامدا ريكشا تىزگىندەۋ تەك ەرلەرگە عانا ءتان دەگەن پىكىر قالىپتاسقان. مەنىڭشە، كەز كەلگەن جۇمىس ەر-ايەل دەپ تالعامايدى. جۇمىسىم وزىمە ۇنايدى. جولاۋشىلارىمدى ۇنەمى جىميا قارسى الىپ، كۇلىمدەپ شىعارىپ سالامىن».
ريكشا جۇرگىزۋشىسىنە تالاپ جوعارى. قاربالاس كەزىندە كەپتەلىستەن جىلدام شىعىپ، جولاۋشىنى دىتتەگەن جەرىنە جەتكىزە ءبىلۋ قاجەت.
اسلى تۇركسيەۆەن، تۋريست:
- باستاپقىدا بۇل قىزدىڭ ءبىزدى اپارا الاتىنىنا سەنىمسىز بولدىم. ءبىراق ايەل بولعانىنا قاراماستان جۇمىسىن تىڭعىلىقتى ىستەيدى ەكەن. قىزمەتىنە ريزامىن.
ريكشا جۇرگىزەتىن ارۋلار كوپتەپ ادام تارتۋ ءۇشىن الەۋمەتتىك جەلىنى بەلسەنە پايدالانادى. عالامتور ارقىلى ىزدەپ تاپقان شەتەلدىكتەر اربا تىزگىنشىلەرىنە الدىن الا كەزەككە تۇرادى. وسىلايشا كۇنكورىس قامىن كۇيتتەگەن قىز-كەلىنشەكتەر ەلدىڭ تۋريزم سالاسىن دامىتىپ ءارى ەڭبەكتىڭ وزىق ۇلگىسىن كورسەتىپ ءجۇر.