ادىلەت مينيسترلىگى سالىنباعان جول ءۇشىن تولەنگەن 6 ميلليارد تەڭگەنى قايتارىپ الدى
حالىقارالىق ساۋدا پالاتاسىنىڭ اربيتراج سوتى قازاقستان رەسپۋبليكاسى ۇكىمەتى مەن تۇرىك كومپانياسى F&A Road Construction اراسىنداعى داۋدى قاراستىردى.
2021 جىلى تۇرىك كومپانياسى قازاقستاننىڭ كولىك مينيسترلىگىنىڭ اۆتوموبيل جولدارى كوميتەتىمەن «قءۇرتءى - بۋرىلبايتال» اۆتوجولىن جاساۋ تۋرالى كەلىسىمشارتقا قول قويعان بولاتىن. مەملەكەتتىك ورگان مەردىگەرگە 5،9 ميلليارد تەڭگە كولەمىندە اۆانس تولەدى، ءبىراق بەلگىسىز سەبەپتەرمەن مەردىگەر جۇمىستى باستامادى.
اۆتوموبيل جولدارى كوميتەتى تولەنگەن قارجىنى ءوز بەتىنشە قايتارۋعا تىرىسقانىمەن، كەلىسسوزدەر ناتيجەسىز اياقتالدى. وسىدان كەيىن، ۇكىمەتتىڭ تاپسىرماسى بويىنشا، ادىلەت مينيسترلىگى مەردىگەرگە قارسى اربيتراجدىق ءىس قوزعادى.
White & Case LLP زاڭگەرلىك فيرماسى بۇل ءىستى 280 مىڭ دوللارعا الىپ، قازاقستان ۇكىمەتىنىڭ اتىنان اربيتراجعا جۇگىندى. اربيتراجدىق ءىس قاراۋعا كەتەتىن جارنا 85 مىڭ دوللاردى قۇرادى.
تۇرىك سەرىكتەستەرى ءوز مۇمكىندىكتەرىن شىنايى باعالاپ، داۋدى بەيبىت جولمەن شەشۋدى ۇسىندى. ناتيجەسىندە، مەردىگەر اۆانستى قايتارۋعا، زاڭگەرلەردىڭ قىزمەت اقىسىن تولەۋگە جانە اربيتراجدىق شىعىنداردى وتەۋگە مىندەتتەمە الدى.
ايتا كەتۋ كەرەك، ءدال ءقازىر وسىعان ۇقساس ءۇش ءىس بويىنشا كەلىسسوزدەر ءجۇرىپ جاتىر. بۇل ىستەردە دە شەتەلدىك كاسىپورىندار قازاقستاننان اۆانس الىپ، مىندەتتەمەلەرىن ورىنداماي، قارجىنى قايتارماعان.